Fans Day ni Divine karong hapon

CEBU, Philippines - Mikatawa ang kanhi PBB housemate nga si Divine Maitland Smith dihang gipangayuan og reaksyon sa Banat News Hugyaw kagahapon kabahin sa pagtupo-tupo niya ug sa big winner nga si Slater Young.

Weird matud pa ang maong sitwasyon gumikan kay sayud ang tanan nga dili siya straight busa wa gyud siya kahibawo unsay iyang reaksyon. Pero mapasalamaton siya sa mga tawo nga nagsuporta nila.

Nasayran nga malaumon ang ilang mga fans nga nagtawag sa ilang grupo og Slavine Pillows nga mulampos ang loveteam sa duruha. Pero si Divine miingon nga managhigala ra gyud sila ni Slater karon, gani may plano sila nga magtukod og negosyo.

Giklaro ni Divine nga misamot kalig-on ang iyang relasyon sa iyang non-showbiz girlfriend sanglit mas daghan siya og nakat -unan sa sulod sa balay kabahin sa relasyon samtang ang iyang uyab may mga pagtulun-an pud nga napupo sa gawas.

Singing ang buot hatagan og atensyon karon nga musulod na siya sa showbiz, apan gitambagan siya ni direk Laurenti Dyogi nga mag-acting workshop busa iya pud nga suwayan.

Samtang may grand fans day si Divine karong ala una sa hapon diha sa Mandaue Sports Complex aron personal nga mahimamat ug mapasalamatan ang tanang misuporta niya sa Pinoy Big Brother Unlimited.

“Balaang Sto Niño” maoy kampeyon

Ang awit nga tinagik nila ni Ian Gerhrome Perpetua ug Kurl Francis Dedumo nga nag-ulohan og “Balaang Sto Niño Ang Giya Ko” maoy kampeyon sa Huniño: Huni Halad Alang Kang Señior Sto. Niño nga gipahigayon niadtong Miyerkules sa gabii sa Basilica del Sto. Niño Pilgrims Center.

Suma pa ni Perpetua nga kinasing-kasing gyud ang iyang pasalamat ngadto sa balaang bata gumikan sa kalampusan sa iyang gi-compose. Gani samtang gigama ang “Balaang Sto Niño Ang Giya Ko”, nag-agi sila og kalisud ug usa na niini ang pagpangita og recording studio ug maayo na lang gani nga nakaabot sila sa katapusan hugna sa pagpasa sa ilang entry.

Si Perpetua ra usab ang nag-hatag og kinabuhi sa iyang awit kung diin nakadawat kini og kusog nga pakpak gikan sa mga audience niadtong higayona.

Samtang ang ikaduhang puwesto naangkon sa “Ikaw ang Kahayag” nga hinulma ni Shoji Hayakawa nga usa ka Filipino-Japanese. Usa siya ka Born Again Christian apan nitoo siya kang Sto. Niño isip manluluwas.

Nasungkit usab sa “Pit Senyor” nga giawit sa Vow Singers ang ikatulong puwesto . Ang maong grupo gilangkoban sa mga tinun-an sa University of San Jose Recoletos.

Mipadayag ang composer niini nga si Jundel Bacalso nga bisan og miabot sila sa punto nga nawad-an na sila og paglaum gumikan kay sila-sila ra ang nagasto ug naabot sa punto nga sa deadline na sila mipasa sa ilang entry apan gipatigbabaw ang ilang pagtoo kang Señior Sto. Niño.

Moabot ngadto sa 15 ka entries ang nadungog sa Huniño kung diin ang tumong niini mao ang paghalad ug pagtamod sa maayong binuhatan sa balaang bata.

Matud pa ni Fr. Jonas Merajes kinsa chairman sa mga hurado nga karong tuiga lang sila naglisod sa paghukom sa mga mananaug gumikan kay nagbaha gyud ang nindot nga mga awit.