Bong, Angel ug Robin movie hapit na maluto

Manila, Philippines --- Nahinabi namo si direk Rico Gutierrez kagahapon ug nangandam na matud pa siya sa meeting niya kagahapon para ma-finalize na ang pelikulang idirek niya para kang Sen. Bong Revilla.

Dako gayud kini nga proyekto kay kun mahinayon, makauban ni Sen. Bong sila si Robin Padilla ug Angel Locsin.

Nabasa namo ang storyline ug nindot ang dagan sa istorya,diin labihan ka challenging ang role nga hatagan og kinabuhi nila ni Robin ug Angel.

As of yesterday, interesado gyud matud pa sila si Robin ug Angel nga himuon ang pelikula apan wala pay siguro kun tugutan ba sila sa ilang management ug kun magkasinabot ba sila sa script.

Grabeng negosasyon matud pa ang gikinahanglan aron magkasabot ang tanang habig.

Ganahan gyud matud pa kaayo si Sen.Bong nga mahinayon ang maong proyekto sa dili pa niya himuon ang pang-MMFF entry nila ni Vic Sotto diin posibling makauban nila si Aiai delas Alas.

Sam gipahuwaman sa Viva

Nag-pictorial na ang tibuok cast sa pelikulang Boy Pick-Up kagahapon sa buntag ug present didto si Sam Pinto.

Nasayran nga personal nga gihangyo sa bida sa pelikula, Ogie Alcasid si Vic del Rosario sa Viva nga pahuwaman si Sam kay importante gyud matud pa ang role nga Neneng B sa nahisgutang movie.

Pero giklaro ni Ogie nga dili si Sam ang leading lady niya kundi si Solenn Heussaff.

Maayo kay misugot si Vic hinungdan nga nakasalmot si Sam sa maong pelikula ug malipayon ang dalaga kay nailhan na matud pa siya karon isip Neneng B.