Gerald nag-atang ni Sarah kay insecure

MANILA, Philippines - Kung kaniadto kang Kim Chiu walay insecurity si Gerald Anderson, kang Sarah Geronino dili siya 100% sure ug kumportabli. Ilabi na nga sa latest film niini si John Lloyd Cruz ang leading man ni Sarah nga gikatahong may pagbati ang dalaga ngadto niini kaniadto. Bisan og taken na karon si JLC ug daw mao pud ni ang padulngan nila sa Pop Princess, tataw nga insecure si Gerald hinungdan nga bisan og dili angay, kanunay kini nga makit-an sa set sa gihimo karong pelikula sa duruha.

Mi-uyon lamang niini si Mommy Divine sanglit hilom lamang nga mutan-aw si Gerald ug wala kini makasamok sa iyang anak.

Gawas pa, daw mahimuot si Sarah kun naa si Gerald sa palibot. Pero, ang nag-react ug nahibulong sa mga pagbisita ni Gerald mao ang mga fans nila ni Loydie ug Sarah nga naa pud sa set. Feel nila na-insecure si Gerald hinungdan nga kanunay kini nga mubisita.

Pangitaon ang Kitchen Musical

I'm sure daghan ang mangita karon kun hain nga channel sa cable gipasalida ang Kitchen Musical nga gihimo sa mga Kapamilya stars nga sila si Karyllle, Christian Bautista ug Thou Reyes sa Singapore ug kun diin nahimamat ni Christian ang iyang girlfriend karon.

Syempre interesado ang tanan nga makita ang maong show sa TV nga midaog og duha ka awards sa, Best Writing at Best Performance, sa New York Festival ug naghatag kang Karylle og nominasyon isip Best Actress sa Monte Carlo Festival ug sa mga co-stars niini nga sila si Arthur Acuna ug Rahman-Hughes isip Best Actor. Ipahigayon karong June ang recognition night sa Monte Carlo Filmfest.

GMA-7 star leading man ni Angel ug Angelica

Sa pagkawala ni Derek Ramsay sa poder sa ABS CBN, daghang Kapamilya actor ang nagpaabot nga mahatagan og roles sama sa gihatagan og kinabuhi niini sa No Other Woman. Pero, dili kini maoy mahitabo sanglit taga GMA-7 ang napiling iparis nila ni Angel Locsin ug Angelica Panganiban sa usa na pud ka love triangle movie nga himuon sa Star Cinema sa direksyon ni blockbuster director Ruel Bayani. Kun unsaon pagkahitabo nga pahuwaman sa Kapuso Network ang ilang premyadong aktor ug kun kinsa pud ang ilang mahuwaman nga artista isip bugti, maoy angay atangan nga mahitabo sa dili madugay.

Pero, sigurado na ang maong panagpares. Samtang, daw in demand karon si Angel gumikan kay laraw pud karon sa Regal Films nga parison sila ni Richard Gutierrez sa usa ka reunion movie.

Angayan sila tanan

Dili angay awayan kun kinsa sa mga pangan nga migawas ang labing haom nga hatagan og titulo isip National Artist tali nila ni Nora Aunor, Gov. Vilma Santos, Dolphy, Joseph Estrada ug Eddie Garcia

Kung buot hunahunaon bisan kinsa nila angayan sa titulo. Gawas nga maayo sila sa ilang trabaho, naghatag pud sila og dungog dili lamang sa industriya kundi hasta na sa nasud. Wala sa ilang mga fans ang gahum aron mahatagan sila sa maong titulo, kundi naa sa mga kamot sa mga tawo nga maoy manukiduki kabahin nila. Sigurado nga maglisud gyud ang matudlo sa maong responsibilidad, sanglit sa pagkatinuod lang, silang tanan angayan nga mahimong National Artist.