CEBU, Philippines - Matag usa ka tawo, adunay talagsaong talento nga gasa gikan sa Diyos.
Si Jianne Maree Nadala usa ka Mass Communication sophomore sa University of the Visayas main campus. Usa pud siya sa mga banggiitang mang-aawit sa bantugan na kaayong UV Chorale, diin gumikan niini libre ang iyang pagtungha.
Bisan sa iyang kabag-o nga miyembro sa maong Chorale, siya nakapakitag mga butang nga daw wala sa uban. Nakahatag siyag garbo ngadto sa iyang ginikanan maingon man usab ngadto sa tunghaan. Nahimo siyang Champion sa Cesafi sa interschool college competition, kansang mga kanta niini mao ang Original Pilipino Music o OPM Category. Tungod niana, misangka siya sa Regional Competition, ug nahimong Champion usab. Nalakip siya isip Top 10 finalist sa national competition. Hangtod karon, pabilin gihapon niyang gipaambitan ngadto sa mga tawo ang iyang talento sa pagkanta. Usa pud siya sa napiliang mosangka sa Europa kauban ang UV Chorale members karong umaabot nga bulan sa Septiyembre 2012, isip pambato sa Pilipinas sa usa ka indigay didto.
Banat News Hugyaw: Pila ang imong edad sa dihang nadiskubrehan nimo ang imong talento sa pagkanta?
Jianne: Walay specific nga age nako nadiskubrehan ang akong talento sa pagkanta tungod bata pa lang gayud ko, hilig gyud ko mokanta kauban sa akong apuhan nga lalaki. Gani daghang mga panahon nga kada kanta sa akong apuhan naa pud ko.
Banat News Hugyaw: Uyon ba ang imong ginikanan sa imong pagkanta?
Jianne: Akong papa uyon kaayo pero ang akong mama, murag doubtful siya tungod lagi sa pagkanta labi na sa kompetisyon usahay mapilde murag mauwaw akong mama. Pero ako tungod naa koy conviction sa pagkanta, mao nang go ng go gyud ko.
Banat News Hugyaw: Kapila naka niapil og mga singing contest?
Jianne: Dili naman ko kaihap og pila gayud tungod sa kadaghan. Nagsugod ko og apil og mga contest pag grade five hangtod sa first year, miundang ko kadali, mibalik nasad sa fourth year high school hangtod sa karon nga nag college nako.
Banat News Hugyaw: Unsay bation sa usa ka Jianne Marie Nadala kung dili niya maangkon ang titulo sa usa ka singing contest?
Jianne: Sa contest, malipay man gyud 'ta nga makadaog pero ato lang atubangon ang kamatuoran nga usahay mapilde man gyud ang tao sa panagtigiay. Ug sa panahon nga mapilde ko, malipay gihapon tungod nabuhat man nako ang labing maayo para ana nga contest sa pagkanta inubanan ang mga pag-ampo ngadto sa Ginoo.
Banat News Hugyaw: Nakabaton ba ka og kalisud sa dihang na miyembro na ka sa UV Chorale?
Jianne: As individual, dili kaayo ingon nga lisud jud, katamtaman lang, kay di man tanang panahon sayon ang mga pisa nga pagakantahon.
Banat News Hugyaw: Unsa may imong bation kung ikaw ang mapilian nga mosangka sa ubang tunghaan para sa indigay sa kanta?
Jianne: Isip usa ka tawo, makulbaan gyud ko kay dili lang ako ang bida nganhi, kundi hasta pud ang ngalan sa akong skwelahan. Dako pong kaulaw para nako nga mapildi ang among skwelahan sa panagtigi sa kanta.
Banat News Hugyaw: Unsay imong mensahe para sa ubang tawo nga mahiligon sa pagkanta?
Jianne: Og unsay passion nga naa diha kanimo karon, ipadayon kini inubanan ang tabang sa Ginoo para mamahimo kang usa ka maayo nga mag-aawit sa umaabot. Ayaw og kabalaka sa imong pangandoy kay naay Dios motabang kanimo. Walay imposible sa iyaha, mabuhat niya ang tanan alang kanimo. Follow your dreams and find courage on it.