CEBU, Philippines - Gikulbaan na karon pa lang ang pambato sa dakbayan sa Sugbo alang sa Miss Aliwan 2012. Apan sa samang higayon naghinam-hinam na pud siya alang sa maong indigay sa kaanyag nga mahitabo karong Biyernes, Marso 13, didto sa Aliwan Theater sa Pasay City.
Sa milabay nga tulo ka tuig, puros mga Sugbuanon ang midaog sa maong indigay sa kaanyag nga usa sa mga highlights sa tinuig nga Aliwan Festival nga gipasiugdahan sa Manila Broadcasting Company sa daghan na nga katuigan.
Dinhi niining maong kalihukan magsangka ang labing maayong mga festivals gikan sa nagkadaiyang dapit sa Pilipinas.
Kahinumduman nga adtong 2009, ang pambato sa Sugbo nga si Sian Elizabeth Maynard maoy napili nga Rayna ng Aliwan. Gisundan siya ni Rizzini Gomez adtong 2010, ug sa milabay nga tuig subling nalangkat ang titulo sa Sugbuanong si Rogelie Catacutan.
Gumikan niini, ang pambato sa dakbayan sa Sugbo karong tuiga, ang Filipina-German nga si Mira Mae Dimmerling, nagsagol ang gibati—kakuba ug kahinam. Hinuon, ang 19-anyos nga si Dimmerling, kinsa tinun-an sa University of San Carlos sa kursong Tourism, dili na bag-o sa natad sa indigay sa kaanyag.
Lakip sa iyang mga titulo mao ang Miss Eco-Tourism Philippines 2011 (1st runner-up), Ms. USC Intramurals 2011, ug Pasigarbo sa Sugbo Festival Queen 2011 (4th runner-up).
“Ang dream man gud sa akong dad nga mahimo kong model maong moapil gyud ko og mga pageants,” tug-an pa ni Dimmerling sa Banat News Hugyaw.
Suma pa niya nga dili sayon alang kaniya ang umaabot nga Miss Aliwan Pageant ilabi na nga daghan kaayo ang iyang makatigi nga mga maanyag usab nga pambato sa nagkadaiyang local government units sa nasud.
Hinuon makamao na gayud siya mupaso, apan nagbansaybansay gihapon siya pagkakaron, ilabi na sa aspeto sa Q&A ubos sa pageant mentor nga si Orly Cajegas. Buot niya nga mahapsay ang iyang performance atol sa maong indigay.
Giangkon niya nga dihang siya maoy gipili isip representante sa dakbayan sa Sugbo, nagduha-duha siya sa pagsanong apan nakumbinser ra gyud siya gumikan kay iyang nakita ang dakong pagsalig kaniya sa iyang pamilya ug mga kahigalaan.
“Na-pressure ko og maayo, kay nakadaug naman gud permi ang Cebu City, basta ako i-promise nga buhaton gyud nako ang akong best aron makadaug sa pageant,” nagkanayon si Dimmerling.
Paambit ni Dimmerling nga normal lang gyud nga makulbaan samtang nagkadoul ang adlaw sa pageant apan inig-kaabot sa stage mawala kini basta ipabilin lang gyud nga positibo ang hunahuna.
“Aron dili kulbaan sa stage, mag-pray gyud ko permi samtang wala pa gasugod ang show,” suma pa ni Dimmerling.
Usa ka modelo si Dimmerling ubos sa pagdumala sa nagkasikat nga designer ug pageant director nga si Lemuel Rosos.
Sa pikas bahin, si Lemuel mipadayag sa Banat News Hugyaw nga dako kaayo siya og pagsalig kang Dimmerling alang niining maong indigay.
Maayo usab mosayaw si Mira-Mae busa haom gayud siya sa nahisgutan nga indigay. Siguradong dili pud mabentahaan ang iyang vital statistics nga 34-24-35, ug ang iyang gitas-on nga 5’8 3/4.