Manila, Philippines --- Si PNoy ang special guest sa unveiling sa OPM2Go sa Eastwood Citywalk adtong Miyerkules.
Ang OPM2Go nga may website address nga www.OPM2Go.com ang giingong "wave of the future” para sa musikang Pilipino. Ang OPM2.Go ang online store nga gitumong para sa Filipino artist, musician ug music lovers. Si Ogie Alcasid ang chairman sa Organisasyon ng Pilipinong Mang-aawit ug siya pud ang pango sa OPM2Go.
Si Ogie maoy nangunay og asikaso sa unveiling sa OPM2.Go. Mitambong si PNoy sa big event kay personal ang imbitasyon kaniya gikan sa bana ni Regine Velasquez.
Very busy ang schedule ni PNoy pero mitambong gayud siya sanglit kumbinsido siya sa panglantaw ni Ogie ug sa panganti niini nga makatabang sa local music industry ug sa sama niyang mga musician.
Labihan ang pasalamat ni Ogie kang PNoy sa pagtambong niini. Gipasalamatan pud ni Ogie si Smart Chairman and TV5 owner Manny Pangilinan gumikan sa full support nga gihatag ngadto sa nahisgutang proyekto. Wala lang makatambong si Papa Manny sa big event kay nag-ninong kini og kasal.
Gabby balik ABS-CBN, nakapirma na!
Balik-ABS CBN si Gabby Concepcion human siya mipirma og kontrata para sa drama series nga bituonan nila ni Andi Eigenmann ug Iza Calzado. Diriyot mahimong Kapuso si Gabby pero wala mahinayon ang paglugwa unta niya sa primetime show ni Richard Gutierrez. Kung nahinayon ang project ni Gabby sa GMA 7, natuyok na unta niya ang tanang network sanglit may drama show man pud siya sa TV5. Mabdos ang asawa ni Gabby nga si Genevieve Gonzales sa ilang second baby. Manganak si Ginbee sa July sa San Francisco, California busa muadto si Gabby karong June. Puros babaye ang mga anak ni Gabby. Wala pa niya ibutyag ang gender sa iyang ikalimang anak. Nanghinaot ang fans ni Gabby nga baby boy ang gisabak karon sa iyang dyowa.