Angeline mibalibad sa hawkanay nila ni Coco

Manila, Philippines- --- Mahinayon na gayud matud pa ang pelikula nila ni Coco Martin ug Angeline Quinto. Ang tsismis,gihunong ang shooting sa movie gumikan kay may eksenang kissing scene ang duruha ug matud pa wala misugot ang dalaga.

 Apan karon medyo misugot na matud pa si Angeline nga makighawok kang Coco bahala na lang og supak sa iyang buot. Sa kadaghan matud pa nga mga artistang babae nga gustong makighawok sa prime actor sa Channel 2, wala nay rason nga mubalibad pa si Angeline.

Dongyan lab-ason ang sinugdanan

Lab-ason nila ni Dingdong Dantes ug Marian Rivera ang ilang kagahapon sa usa ka resort nga ilang giadto kagahapon sa Zambales alang sa taping sa My Beloved.

Halandumon ang maong resort alang kanila ni Dong ug Yan sanglit dinhi sa maong resort nila gihimo ang usa ka teleseries nila five years ago.Hinuon sa tweet ni Dong wala niya hisguti kun didto ba gyud sa maong resort namugna ang ilang pagminahalay ni Marian.

Unsaon, nga never man nilang gipublikar kun kanus-a gyud ang ilang anniversary. Sama sa una na nilang mga pamahayag, dili sila magsaulog og anniversary nila. Nagdumili pud si Dong pagtumbok unsa nga series ang nahimong dalan aron magkahigugmaay sila.

 Duha ka adlaw nga mag-istar sa maong resort sila si Dong, Marian kauban ang pipila pa ka mga cast sa My Beloved.

Bossing Vic nagpakondisyon

Nagpakondisyon na lang si Vic Sotto kinsa naospital og pipila ka adlaw gumikan sa overfatigue. Mao nay hinungdan nga usahay tingog ra niya ang madungog sa Eat Bulaga, sa ingon makauban gihapon niya ang mga fans sa show nga gihidlaw sa iyang presensya.

 Sunod semana may show sa Cow Palace sa San Francisco ang EB Dabarkads. Dili gyud mahimong wala si Vic ilabi na nga naa pud sila si Joey de Leon ug ang iyang igsuong si Senador Tito Sotto gumikan kay Lenten break man niini sa Senado.

 Busa posibli nga inig gikan pa sa San Francisco mulugwa sa live broadcast sa Eat Bulaga si Vic.