CEBU, Philippines - Human sa sagunson nga mga pagdayeg nga nadawat sa miaging semana, napanglantawan nga nameligro karong semanaha ang Filipino-Mexican-American contestant sa American Idol nga si Jessica Sanchez.
Gikatahong wala mahimuot ang mga hurado sa performance ni Jessica sa dihang gikanta niini ang awit ni Gloria Estefan nga “Turn the Beat Around” atol sa “Year You Were Born” night sa nahisgutang programa.
Ang hurado nga si Steven Tyler nagkanayon nga wala kaayo makuha ni Jessica ang tono sa maong kanta ug nabagay lang gyud ang iyang tingog sa ballad.
Samtang si Randy Jackson nagkanayon nga wala mahaom kang Jessica ang giawit niini ug iyaha kini nga gitambagan nga kinahanglan nga mopili og kanta nga iyang makaya.
Si Jennifer Lopez mikomento sa “strong vibrato” ni Jessica nga dapat unta dili angay ma-apply sa gikanta niini.
“It’s the type of thing that your voice has such a strong vibrato who is so beautiful on certain songs but on songs like this where you have to really be on syncopation, be on that beat, it lagged a little bit behind so it lost a little bit of the energy,” suma pa ni Jennifer.