GMA Films sinisiguradong mabibigyan ng trabaho ang lahat ng Kapuso stars

Magiging busy ang GMA Films this year sa rami ng pelikulang balak nilang gawin. Susundan nila ang My Kontrabida Girl na showing sa March 14 at The Witness na March 21 ang playdate.

May mga titles na binanggit na project si Tracy Garcia at kung sino ang cast pero nakiusap na ’wag munang isulat dahil baka mapalitan. Ang siniguro nito, lahat ng talents ng GMA 7 at GMA Artist Cen­ter ay mabibigyan ng pelikula.

Ang puwedeng banggitin ay kung sinong mga direktor ang kinukuha ng GMA Films para gumawa ng pelikula sa kanila kabilang dito sina Topel Lee, Mark Reyes, Dominic Zapata na two movies ang gagawin kasama ang Boy Pick-Up, Mac Alejandre na direktor ng Just One Summer, at si Yam La­ranas for another suspense-thriller.

Tuloy pa rin ang pelikula ni Richard Gutierrez na isang disaster movie pero hindi na si Iza Calzado ang leading lady. Gagawin siguro ni Richard ang pelikula after ng action-drama series niyang Rancho Paradiso o puwede ring isabay.                                        

Derek magre-renew na ng kontrata sa Kapamilya

This week na muling pipirma ng kontrata sa ABS-CBN si Derek Ramsay, kaya hindi totoo ang balitang iiwan ng aktor ang ABS-CBN para lumipat sa TV5. Ibig sabihin, mapapanood na uli siya sa isang soap ng network.

Sa pagre-renew ni Derek ng kontrata sa Kapamilya, masusundan pa ng maraming pelikula ang  Corazon: Ang Unang Aswang nila ni Erich Gonzales. Ang tagal ding pinag-usapan na iiwan ng aktor ang Kapamilya, hindi naman pala totoo!

Edgar Allan hindi matapus-tapos ang isyu sa dyowa

Si Edgar Allan Guzman ang makakapareha ni Danita Paner sa Isang Dakot na Luha ng TV5 at this week na magti-taping ang aktor. Ngayon lang uli nabigyan ng soap ang aktor pero hindi dahil kinastigo siya kundi dahil sa kontrobersiyang kinasangkutan na pag-iwan sa kanyang pamilya para makipag-live-in arrangement sa girlfriend.

Teka lang, iniwan na ba talaga ni Edgar Allan ang love nest nila ni Jolan na former member ng Sexbomb at bumalik na sa bahay ng kanyang ina? Pero bakit may mga nakakabasa ng tweet ni Jolan na hinihintay niya ang pag-uwi ni Edgar Allan at bored siyang mag-isa sa bahay nila? Hala!

   Sana lang, hindi maapektuhan ang career at pagiging magaling na aktor ni Edgar Allan sa hindi matapus-tapos na isyu sa kanya. Magaling pa naman siya sa Maalaala Mo Kaya at nominated sa 9^th Golden Screen Awards sa Best Performance by an Actor in a Leading Role-Musical or Comedy para sa pelikulang Ligo Na U Lapit Na Me.

Dingdong at Marian nakaabot sa diyaryo sa Middle East

Nakita naming pinoste sa Internet ng mga fans nina Dingdong Dantes at Marian Rivera ang Al Jazeera newspaper sa Middle East kung saan featured ang dalawa at ang My Beloved with matching pictures nila.

Hindi namin naintindihan ang nakasulat, kaya hindi namin batid kung paano nakarating sa newspaper ang bagong soap nina Dingdong at Marian. Hindi rin makukumpirma kung totoong gustong bilhin ang rights ng My Beloved para maipalabas sa Malaysia.

Samantala, pupunta sa Davao sa March 17 si Marian para sa Karimadon at segue na rin sa Araw ng Dabaw. Ipo-promote na rin nito sa mga taga-Davao ang My Beloved. Hindi pa namin batid kung kasama niya sa Davao ang actor boyfriend.