CEBU, Philippines - Gawas sa iyang showbiz career, busy usab ang sexy actress nga si Bangs Garcia sa painting gumikan kay mao na kini ang iyang hilig sukad pa kaniadto.
Gina ug Manny nag-debate
Sila si Gina Lopez sa ABS-CBN ug Manny V. Pangilinan sa TV 5 maoy nag-debate sa gipahigayong Conference on Philippine Mining’s Impact on Economy and Ecology niadtong Biyernes kung diin gituki nila ang environmental issues.
Wil Time world tour
Adunay world tour ang Wil Time Bigtime ni Willie Revillame karong summer ug gikatakda nga motikang ang maong programa sa San Francisco, New Jersey, ug Dubai.
Gwendolyn naglinabad?
Mitumaw karon ang taho nga matud pa nga nausab na ang batasan ni Miss World 2011 1st runner-up Gwendolyn Ruais sukad kini nakahupot og titulo apan “no comment” ang dalaga kalabot niini.
Toni sa Wansapanataym
Si Toni Gonzaga maoy bida sa duha ka special episodes sa Wansapanataym sa ABS-CBN . Kini naglangkob sa ‘Witchy Mitch’ ug ‘Hannah Panahon’.
Yogo mibalik sa Dos
Wala’y pugong-pugong nga gibutyag sa child actor nga si Yogo Singh nga wala na siya giatiman sa GMA-7 sukad nahuman ang Futbolilits hinungdan nga mibalik siya sa kanhi niya network nga ABS-CBN ug nalakip siya karon sa pantaseryerng Wako-Wako.
Gerald dili gyud makalimot
Dako og utang kabubut-on si Gerald Anderson ngadto sa tawo nga nakadiskubre kaniya nga si Jun Reyes busa tagaan gihapon niya kini og komisyon bisan pa man nga under siya sa Star Magic.
Just One Summer sugdan na
Karong Biyernes, March 9 ang first shooting day sa pelikulang Just One Summer , ang launching movie nila Julie Anne San Jose ug Elmo Magalona ug ubos kini sa direksyon ni Mac Alejandre.(Sanden J. Anadia)
Erich nagpa-retoke sa suwang?
Miulbo ang mga pagduda nga matud pa nag-paretoke sa suwang si Erich Gonzales gumikan kay igo ra kini mipahiyon sa dihang gipangutana siya kalabot niini.
Wala mikumpirmar ug wala usab mi-deny ang aktres sa dihang gipangutana siya kung tinuodba nga nagparetoke siya sa suwang.
Hinuon ang mga suod nga higala ni Erich misaysay nga dili tinoud ang maong istorya ug natural lang gyud ang pamorma sa nawong sa aktres.
Samtang ang fans sa aktres misaysay nga kanunay gyud nga intrigahon ang ilang idolo apan dili gihapon kini mosaler.
Busy si Erich karong panahona gumikan sa promosyon sa pelikula nila ni Derek Ramsay nga “Corazon: Ang Unang Aswang”. (Sanden J. Anadia)
Jewel ni Jason
Gidayeg pag-ayo ni Jason Abalos ang maayong pag-arte sa iyang uyab nga si Jewel Mische sa bag-ohay lang nga natapos nga Maria La Del Barrio.
Suma pa ni Jason nga saludo gyud siya kang Jewel gumikan kay maayo kini magminaldita atubangan sa kamera ug iyahang na-obserbahan nga mi-improve na ang aktres.
Matud pa sa aktor nga bisan unsa nga karakter ang dawaton ni Jewel gumikan kay gusto gyud niini nga makat-on.
Malipayong gipahibalo ni Jason nga nagpabiling lig-on ang relasyon nila ni Jewel. (Sanden J. Anadia)
Ali mi-resign sa “Personalan”
Gikatahong mi-resign si Ali Sotto sa programa niya nga “Personalan” sa GMA News TV- Channel 11. Matud pa nga wala pud dawata ni Ali ang ubang mga programa nga gitanyag kaniya sa News & Public Affairs department sa GMA-7.
Mitumaw usab ang mga intriga nga matud pa nga gikapoy na si Ali apan dunay pu’y istorya nga motikang sa abroad ang TV host gumikan kay tua na didto nagbase ang iyang anak.
Hinuon wala mohatag og komento si Ali sa nahisgutan nga mga intirga ug nagdumili gihapon kini pagbutyag sa rason sa iyang pagbiya sa Personalan.
Gikatahong ipadayon gihapon sa GMA News TV ang programang Personalan gumikan kay daghan na kaayo kini og followers ug padayong nangita og babaye ang maong istasyon aron ihulip kang Ali. (Sanden J. Anadia)
Charice na pud nga torno
Giingong mobanat pagbalik ang pag-promote ni Charice sa iyang concert sa Araneta Coliseum sulod karong buwana. Gikatahong nahilom ang promosyon niini sa miaging semana gumikan sa concert nila ni Jose ug Wally apan karon nga nahuman na kini, panahon na ni Charice nga siya na pud ang mohataw og promote sa iyang konsyerto.
Lloydie magtulala kung…
Tsika pa ni John Lloyd Cruz nga mablanko ang iyang kaugalingon ug magsige og tulala kung siya broken-hearted. “One time, sinundo ako ni Tita Nenette, ‘yung handler ko from Star Magic. Dinatnan niya ako sa bathtub, suot ko ‘yung clothes ko from last night. Ayokong tumayo, parang ayaw mong mag-function,” suma pa sa aktor.
Bettina misalikway sa kanhi partner
Dili gusto si Bettina Carlos nga hisgutan pa ang amahan sa iyang anak nga si Gummy. Mapasalamaton si Bettina gumikan kay duna siya’y mga higala nga maoy mibarog nga amahan sa iyang anak.
Birthday ni Rudy gisaulog
Gisaulog ni Lorna Tolentino ug sa iyang pamilya ang 60th birthday ni anhing Rudy Fernandez niadtong Sabado ug usa ka Santos nga Misa ang gipahigayon sa Heritage Park, Taguig nga gitambongan sa suod nga mga higala ni Daboy.
Sayop paglitok
Mipalag ang Bureau of Customs sa padayag ni Taylor Kitsch sa programang Late Show With David Letterman nga matud pa nga interesado ang custom official sa iyang iPhone. Giingong nahitabo ang insidente sa Indonesia, dili sa Pilipinas. Ang TV host nga si David ug dili si Taylor maoy nag-mention sa pulong nga Pilipinas.
Vic mipahinungod og kanta sa ex-GF?
Naintriga ang nanan-aw sa concert nila ni Wally ug Jose niadtong Biyernes sa gabii sa dihang ang guest performer nila nga si Vic Sotto mikanta og Someone Like You ni Adele ug daghan ang nagduda nga gi-dedicate kini sa kanhi niya uyab nga si Pia Guanio nga nitan-aw usab sa concert niadtong higayona. “Never mind, I’ll find someone like you. I wish nothing but the best for you, too,” pipila sa linya nga giawit ni Vic.
Danny mobalik sa industriya
Dili tinuod ang mitumaw nga report nga matud pa mipanaw na niadtong Biyernes ang beteranong direktor nga si Danny Zialcita. Suma pa sa kampo sa direktor nga mobalik si Danny sa industriya sa higayon nga maka-recover na kini sa operasyon. (Sanden J. Anadia)
Win na Win!
Ang station manager sa Win Radio 107.5 nga si Engr. Roger Calape malipayong mipahibalo nga gikan ikaupat nga pwesto sa tanang FM stations sa Sugbo, karon misaka sila sa ikatulo nga ang-ang. Kini basi sa labing bag-ong survey result nga giluwatan sa AC Nielsen. Suma pa ni Calape nga sa ikatulong quarter sa 2011, ranked number 4 ang estasyon, apan sa katapusang bahin sa milabay nga tuig naa na sila sa ikatulo.
Giisip kini ni Calape nga dakong kalampusan sanglit gihimo ang survey nga wala pa silay tuig sa ilang operasyon. Nasayran nga unang nadungog ang Win Radio 107.5 sa kahanginan niadto lang January 23, 2011. Gumikan niini mapasalamaton siya sa masa nga maoy nagtuboy kanila sa ilang nahimutangan karon.
Matud pa ni Calape nga dili basta-basta ang ilang paningkamot aron lang gyud makuha ang nahisgutang puwesto ilabi na daghan usab nga mga nindot nga FM stations karon sa Sugbo. Mapaubsanon niyang gibutyag nga numero uno ang Win Radio sa mga taxi units ug mao na kini ang kasagaran nga nabantayan sa publiko ilabi na dunay bata nga mosinggit og, “Win Radio, Win Radio!” Tinuod nga bata gyud ang nanag-iya niining maong tingog nga nahimo na nga tatak sa istasyon.
“Sa radio, walay sekreto, kay imo man i-play ang materials nga angayan paminawon sa mga listeners. It’s all about programming content. Before we got into it, kahibalo na mi kung kinsa ang among target audience ug unsang klaseng programming ang magustuhan sa mga tigpaminaw. So simple lang, know your audience and implement the kind of programming nga mo-click. Walang sekreto,” paambit pa ni Calape sa Banat News Hugyaw.
Gibutyag usab niya nga usa sa naka-hugyaw sa Win Radio mao nga dili sila mo-play og mga kanta nga law-ay ang mga lyrics.
Samtang ang production supervisor sa maong istasyon nga si Dexter Calipay misaysay dinhi sa Banat News Hugyaw nga maong nagkakusog ang Win Radio kay “Less Talk, More Music” ang ilang drama.
Lima ka disc jockeys ang kasamtangang nanganawkanaw ang tingog sa maong Win Radio, usa na niini si Baby Machete kinsa beterano sa natad sa panibya sanglit gikan naman siya sa nagkadaiyang istasyon.
“I am a genuine friendly and out going person, a good guy, I am passionate sa ako mga buhaton,” matud pa ni Baby Machete kinsa madungog pinaagi sa programa niya nga “The Number 1 Show” ,(11am-1pm), ug “The Night Show” , (7pm-9pm) gikan sa Lunes ngadto sa Biyernes.
Samtang kanhi working student ang laing DJ sa Win Radio nga ginganlan og Macho Bibo kinsa gradwado sa kursong Bachelor of Science Major in Political Science sa Southwestern University. Sama kang Machete, ubay-ubay na pud nga istasyon ang iyang naalagaran sa wala pa siya mibalitok paingon sa iyang nahimutangan karon. Madungog siya sa Maayong Buntag Cebu!, (6-9am) gikan sa Lunes hangtud sa Sabado.
Dili usab magpaulahi sa pagsaba-saba sa kahanginan ang mass communication graduate sa St. Theresa’s College nga si Lady Dada kinsa nakatrabaho na kaniadto isip reporter sa CCTN –INTV Channel 47. Madungog si Lady Dada sa programang Chika-Chika, 9am-11am ug “Go Dada Go” 3-5pm gikan sa Lunes hangtud sa Sabado. Madungog usab siya sa Saturday Heart Stories, 1-3pm matag Sabado.
Samtang usa ka registered nurse ang laing DJ nga si Mama Lou kinsa nagsugod na sa broadcasting industry niadtong late 90’s ug nakasuway na usab sa pagtrabaho sa BPO industry, public relations, events coordinating, youth formation ug uban pa. Madungog siya sa Heart Stories with Mama Lou 1 - 3pm , Lunes hangtud sa Sabado.
Kanhi DJ sa laing planeta ang labing bag-o nga DJ sa Win Radio nga si Ringo Bingo kinsa nagtrabaho na kaniadto isip call center agent ug nahimong talent sa usa ka event agency nga nagbase sa Sugbo. Madungog si Ringo Bingo sa programang “Maayong Buntag Sugbo”, 4-6am ug “Happy Hour,” 5-7pm gikan sa Lunes hangtud sa Sabado.
Dungan niini, pasalig ni Calape nga dili siya mohunong sa pag-search og mga kanta nga patok sa masa gumikan kay mao kini ang hinungdan kung nganong nagkakusog sila sa kahanginan.
Covered court sa Manila ipa-renovate ni Rachel Weisz
Ang international actress nga si Rachel Weisz maoy mogasto sa pagpa-renovate sa covered court sa San Andres, Manila ug iya kining gituyo isip pasalamat sa mga tawo sa maong dapit kinsa mihatag og kooperasyon sa Hollywood film niya nga “Bourne Legacy”.
Kahinumduman nga sa maong covered court giparada ang iyang sakyanan sa dihang gihimo ang shooting sa maong dapit.
Nasayran nga mihimo usab og relief operation dili pa lang dugay ang mga casts ug production crew sa “The Bourne Legacy” sa nahisgutang lugar ug ang local stars na lang nga sila si John Arcilla ug Lou Veloso maoy nag-apud apod sa mga relief goods sanglit wala na sa nasud ang mga bida nga sila si Rachel, Jeremy Renner ug Edward Norton.
Nagkanayon ang executive producer sa pelikulang “Bourne Legacy” nga si Patrick Crowley nga dul-an sila sa duha ka buwan nga nag-shoot sa Pilipinas busa duol na kaayo sa ilang kasing-kasing ang mga residente sa Manila.
Kahinumduman nga gatosan ka mga residente sa maong dapit ang gihimong extra sa maong pelikula ug nakadawat usab kini og makiangayong talent fee. (Sanden J. Anadia)