CEBU, Philippines - Kinahanglan gayud nga mag-budget tungod ug alang sa imong pamilya. Apan unsaon man?
Aniay pipila ka mga pamaagi:
Isuwat ang pa-ingnan sa kwarta
Ang labing importanting pamaagi aron ka maka-budget sa imong kwarta mao ang pagsuwat niini--bisan sa usa ka notebook o sa inyong computer-- ang importanti aduna kay listahan.
Gawas niini, imo usab nga i-update ang kada-adlaw nimong budget nga mas epektibo nga paagi.
Ang paglista sa imong nagasto kada-adlaw magsilbi nga pahinumdom hain padulong ang imong kwarta ug mupasabot kun may sayop nga paggasto sa kwarta alang sa inyong pamilya.
Daily Tracking
Kinahanglan usab nga kanunayon ang pagsunod sa kada piso nga imong magasto bisan paman og mukaon kini og oras aron imong masuta kun pila na ang imong nagasto.
Kay kun dili ka magsunod sa imong kada adlaw nga nagasto adunay posibilidad nga imo nang makalimtan kun asa ug gi-unsa nimo ang imong kwarta.
Gikinahanglan nga bisan og 15-minutos sa imong busy nga oras imong igahin alang sa pag-update sa imong family budget aron adunay nindot nga management result.
Hukom sa paggamit sa kwarta
Kun magplano ka sa imong family budget, imo gayud nga siguruon nga aduna kay igahin alang sa kalingawan kaysa adunay kay nahuna-hunaan nga gustong himuon aron malingaw imong pamilya apan napakyas kini tungod sa walay budget planning.
Pipila niini ka pamaagi mao nga imbis nga mogawas ug motan-aw sa sinehan uban ang imong pamilya, pag-rent na lang og mga dvd aron sa balay nalang tan-awon.
Imbis nga makiglaag ka sa imong mga anak kausa sa usa ka semana himua kini nga kausa sa duha ka semana o dili ba ka usa sa usa ka buwan.
Kini aron usab dili ka makunsensya sa imong mga anak nga migasto kag lain unya sa ilaha wala ka migahin og oras ug salapi alang sa ilang kalipay.
Savings
Ayaw usab kalimti nga ilakip sa imong family budget ang pagtigum bisan paman og gamay lang nga kantidad. Kini isip panagana nga aduna kay makuot sa panahon sa dinaliang panginahanglanon.
Kinahanglan nga sa dili pa ka mobayad o mogasto sa bisan unsa, imo usa nga kuhaan og gamay’ng kantidad ang kwarta aron itagana isip imong tigum.
Bisan paman og P100 lang ang imong igahin isip savings sa matag sweldo makurat ka na lang nga midako na diay ang imong tinigom.