Mga artistang expert sa poker nakikipag-agawan sa P2 million

Aba napakalaki pala ng naghihintay na premyo sa mananalong poker player sa kasalukuyang ginaganap na Celebrity Poker Tournament ng Mowelfund sa Midas Touch Poker Sports Club.

Tumataginting na P2 milyon ang maiuuwi ng mananalo sa mga naglalarong propesyonal at apisyonado mula sa sector ng entertainment at business. Ang kikitain sa palaro ay gagamitin para sa mga Mowelfund beneficiaries at programa ng Mowelfund Film Institute.

Matatapos ang tournament na ginaganap sa Midas Touch Poker Club na matatagpuan sa #7 Captain Henry Javier St., Brgy. Oranbo, Pasig, MM sa Jan. 29. Nagsisimula ang laro ng 3:00 ng hapon.

Sana marunong ako ng poker, baka sumali pa ako. Kaso hanggang tong-its lang ako. Mahjong pwede rin.

Piolo may kasalanan sa pagpapa-sexy ni KC

Pati na ang inaanak kong si KC Concepcion, nag-pose na rin ng sexy sa isang magazine.

Ang nagagawa nga naman ng isang broken heart. I’m sure kung hindi nagdurugo ang puso ni KC ay hindi ‘yun magsusuot ng swimsuit, kahit anong magazine pa ‘yun, kahit pa pinaka-mataas ang sirkulasyon nun.

Dun na lang niya siguro ibinaling ang frustration niya. Tulad din ng ginawa niyang pagpapaputol ng buhok.