MANILA, Philippines - Pumila ang maraming tao para makapanood ng mga paboritong Star Records artists sa Glorietta Activity Center na hawak-hawak ang January issue ng magasing Inside Showbiz. Ito ang pasaporte nila para sa ginanap kamakailan na Inside Showbiz Live! concert na tinambakan ng mga sikat at magagaling na performers.
Nagtilian ang mga fans sa pagsalang ni Jovit Baldivino at kinanta ang I’d Do Anything for Love. Sumunod naman si Liezel Garcia na kinanta ang Climb at ang popular na Gisingin ang Puso, ang theme song sa isang Korean novela. At ang huling guest sa unang set ay si Bugoy Drilon.
Ang next set ay pinangunahan ni Yeng Constantino. Nasorpresa ang crowd sa kanyang Eraserheads medley. Sumunod naman ang Sessionista singer na si Juris na nag-acoustic. Ang finale ay ang Prince of Pop na si Erik Santos. Kinanta niya ang ilang nakapaloob sa latest album na Awit Para sa ’Yo.
Tuwang-tuwa ang mga naunang fans sa venue dahil sa mga giveaways mula sa Sisters Napkin, Glutamax, Medical City, at Pregroe.
Ayon kay Rikka Dylim, ang Inside Showbiz executive editor, marami pang kaabang-abang na istorya at magagandang pictorials sa mga susunod na issue ngayong taon.