E-Boy mupahilak na

CEBU, Philippines - Karong Enero 30, na gyud maaninaw ang launching project ni MMFF 2011 Best Child Performer Bugoy Cariño sa ABS-CBN.

Giulohan og E-Boy, istorya kini sa usa ka bata nga robot apan daw sama sa tawo ang pagbati ug abilidad. Magpakita kini sa kamahinungdanon sa pamilya, paghinigalaay ug walay kinutubang gugma.

Apil niining maong serye ang Sugbuanong runner-up sa Star Power nga si Akiko Solon.

Makauban usab nila ang mga banggiitan na nga mga artista nga naglakip nila ni Ariel Rivera, Jomari Yllana, Agot Isidro, Valerie Concepcion, Jaime Fabregas, Chinggoy Alonzo, ug Pen Medina.

Naa pud sa casts sila si Blythe Gorostiza, Arjo Atazde, Carme Sanchez, Bryan Santos, ug ang mga child stars Maliksi Morales ug Deydey Amansec.

 Ubos kini sa direksyon ni FM Reyes ug Nick Olanka, ang nagmugna sa malampuson nga mga pantaserye sama sa “Lobo” ug “Imortal”.

Sarah muhawa sa ASAP!

Mubiya usa si Sarah Geronimo sa ASAP Rocks aron gahinan og igong panahon ang umaabot niya nga solo show, “Sarah G. Live” matag Domingo sa ABS-CBN sa dili madugay.

Gituohan nga ang maong show maoy muhulip sa timeslot sa Gandang Gabi Vice ni Vice Ganda sanglit mupahuway usa ang komedyante, apan magpadayon ang iyang Showtime.

Very happy po ako sa concept nung show.

 "Pangalan ko po ang dadalhin ko dito, na ninenerbiyos po ako kasi, siyempre, sariling show na natin 'to. "But, of course, makakasama ko ang ibang artists din, magagaling na artists.

"So, abangan po natin," nagkanayon si Sarah ngadto sa PEP. Giangkon ni Sarah nga sa sinugdanan nahadlok siya ug nagdumili pagdawat sa dakong responsibilidad apan kun mao matud pa ni ang makapalambo pa niya isip singer ug aktres, walay rason nganong mubalibad siya.

Suma pa nga murag live concert ang mahitabo matag Domingo sa nahisgutang musical show.

Samtang hingpit na nga giangkon ni Sarah nga Tiffany necklace ang giregalo ni Gerald Anderson ngadto kaniya, samtang t-shirt, nga ang iyang mommy Divine ang nagpili maoy iyang pinaskohan ngadto sa young actor.

Bruno Mars naluwas sa kaso

Gipahibalo sa kampo ni Bruno Mars nga napapas na ang hugaw nga imahe sa Fil-Am singer human nabasura na ang kaso nga giatubang niini gumikan sa paghupot og cocaine.

Suma pa sa report nga nakompleto na ni Bruno kapin sa 200 ka oras nga community service nga maoy nasabotan nila sa korte sa Las Vegas bugti sa iyang guilty plea sa nahisgutang kaso.

Matud pa sa legal counsel ni Bruno nga si Atty. Blair Berk, nga misubra og 200 oras ang pagserbisyo ni Bruno sa kumunidad ug nahuman na usab niini ang drug education classes nga lakip sa gimando sa korte.

Kahinumduman nga niadtong 2010 , giaresto si Bruno Mars o Peter Hernandez sa tinuod nga kinabuhi human dunay hotel attendant ang mitug-an nga duna siya’y nakit-an nga kadudahang butang nga gidala ni Bruno.

Hinuon nagsabot ang kampo sa singer ug korte nga imbes nga magtingkagol sa prisohan, nakahukom kini nga mohimo og 200 oras nga community service, usa ka tuig nga probasyon ug gipabayad siya og $2,000 .Kung wala pa tumana ni Bruno ang ilang kasabotan, upat unta kini ka tuig nga mapriso.