Happy Yipee tsugi na gyud?

CEBU, Philippines - Duha na ka mga taga ABS-CBN ang tinubdan sa PEP nga matud pa kutob na lamang February 4, ang noontime show nga Happy Yipee Yehey.

Tsugi na matud pa ang maong show ug gipaabot na lamang ang unang anibersaryo niini sunod buwan.

Kahinumduman nga makadaghan na gibalita nga tangtangon na ang nahisgutang noontime show nga giduma nila ni Toni Gonzaga, Pokwang, Rico J. Puno, Randy Santiago ug John Estrada gumikan kay matud pa wala gyuy alibyo ang rating niini.

Apan ang mga hosts nga makadaghan na nakuhaan og pamahayag kabahin sa posibilidad nga tsugi na sila, makadaghan na pud nga nanghimakak sa maong mga balita.

Suma pa nila, suportado sila sa management ug giingnan pa gani sila nga maglingaw-lingaw lang aron usab malipay ang mga viewers ug dili hunahunaon ang ratings.

Hangtud sa pagsuwat niining balita kagahapon sa hapon, wala pay reaksyon ang ABS-CBN kabahin niining maong tsika nga kutob na lamang sunod buwan ang nahisgutang noontime show.

Carmina si Kim ang buot makauban

Hingpit na gayud nga mipirma og kontrata sa ABS-CBN ang mibalik nga Kapamilya nga si Carmina Villaroel adtong Lunes sa hapon, January 16.

Subay sa kontrata nga gipirmahan ni Carmina, duna na siya’y umaabot nga talk show diin magkauban sila pag-usab ni Janice de Belen nga karon naa na pud sa nataran sa ABS-CBN ug sama niya nga kauban sa GMA-7 kaniadto sa morning show nga Sis. Lakip sa Sis kaniadto si Gelli de Belen nga naa pud karon sa TV5.

Dugang pa niini, may himuon pud nga teleserye si Carmina diin gipadayag niya nga buot niyang makauban si Kim Chiu og trabaho sanglit daghan matud pa ang namulong nga anggid sila og nawong. Kahinumduman nga nagsugod si Carmina sa ABS-CBN diin gipaila siya sa sikat kaayo nga sitcom Palibhasa Lalaki adtong 1991. Pagka 2003, milayat si Carmina paingon sa GMA-7. Human sa walo ka tuig, mibalik na siya karon sa ABS-CBN.