CEBU, Philippines - Karong gabii na ang gipaabot nga Sinulog Idol 2012 Grand Finals sa Fuente Osmeña Circle. Sulod sa pipila ka gabii nagkainit gyud ang tigi sa mga idols diin sa sinugdanan 12 finalists ang gipaila adtong Enero 6.
Adtong Martes, walo na lang ang nagtigi, diin gipaabot nga may usa nga matangtang, apan sanglit nagka maayo ang performance sa mga hopefuls nahukman nga salbaron lang usa silang tanan. Apan kagabii, duha ang siguradong natangtang ug nailhan na pud ang Top 6 nga maoy magtigi karong gabii.
Suma pa ni Sinulog Idol project director Gloria Villarojo nga 140 ang mi-audition sa maong kompetisyon ug 38 ang ilang gikuha sa unang round hangtud gihashasan nila pinaagi sa pagpili sa 12 ka finalists.
Nasayran nga mahanas gyud og maayo ang mga finalists sanglit kada adlaw ang ilang rehearsal ug matag gabii human sa performances, may general evaluation nga ipahigayon, gawas pa sa komentaryo sa mga hurado.
Atol sa komentaryo nga madungog sa tanan, wala gyuy lipud-lipod sa ilang mga komento ang mga hurado nga gilangkuban nila ni Center for Pop-Cebu branch manager Jay Unchuan, Pinoy Dream Academy scholar Apple Abarquez ug Banat News Hugyaw editor ug dyRC program host Ryan Mark.
Nagkanayon si Villarojo nga nauyonan sa mga hurado nga sa samang higayon sila usab ang mubarog nga mentors sa tanang finalists, pinaagi sa nagkadaiyang workshops sa dili pa ug human sa kompetisyon.
Ang tinuig nga Sinulog Idol gidumala sa Cebu City Government, Sinulog Foundation Inc., Center for Pop Music Philippines ug Soundtraxx Productions Studio. Dili lang kay ang pagkanta ang focus sa nahisgutang kompetisyon, gibansay-bansay usab ang mga finalists sa pagsayaw ug saktong gesture kung naa sila sa entablado. Gitudluan usab sila unsaon pagpakighugoyhugoy sa entertainment press, ingon man tukma nga pamatasan. Nagkalain-lain nga genre ang sagubangon sa finalists matag gabii, diin sa unang gabii ilang gipakita ang ilang potensyal sa “sing and dance performance”, ug gisundan na usab sa pag-awit nila sa Visayan song, rock song, live performance uban sa keyboardist, ug broadway.
“Dili raman ingon nga kutob ra sa contest ang Sinulog Idol, mura raman siya og academy kung diin i-train gyud pag-ayo ang mga idols,” matud pa ni Villarojo.
Pipila sa mga idols nga naabtan sa Banat News Hugyaw niadtong Martes sa gabii mao sila si Mark Vincent Seville, John Hammond Jr., Kris Jordan Seville, Rovee Marie Fernandez Jem Felicilda, Ronna Jenn Lofranco, Danielle May Ozaraga ug Ashley Campbell.
Ang unang upat ka hopefuls nga natangtang mao sila si Mark Ian Potencioso, Marlon Tansengco, Neil Ampo ug Charlaine Berondo.
Si Mark Vincent maoy Star of the Night sa Visayan genre, si Rovee sa Rock, si Jem sa Sing and Dance, si Ronna sa Idol’s (song) Choice.
Sa miaging tuig pa lang, gipaubos na ang mga idols og voice lesson ka duha sa usa ka semana diha sa Center for Pop.
Mopatigbabaw gyud ang pagka-disiplinado sa mga idols gumikan kay gipangtuman gyud nila ang saktong oras sa mga rehearsal sanglit mao kini ang usa sa mga sukaranan sa usa ka maayong “idol”.
Ang mahimong grand winner karong gabii madugang sa listahan sa mga idols nga naglangkob nila ni Jackie Chang, (Sinulog Idol 2010) ug Rachelle Mae Faelnar (Sinulog Idol 2011). (BANAT NEWS)