Kinsay musunod nga Sinulog Idol?

CEBU, Philippines - Muarangkada na sugod karong Biyernes, Enero 6, ang usa sa labing gipaabot nga indigay matag Sinulog Festival, ang Sinulog Idol. Anaa sa iyang ikatulo ka tuig, ang Sinulog Idol bangga sa mga batan-ong mga mag-aawit matag gabii diha sa Fuente Osmeña Circle sulod sa usa ka semana. Dose ka mga finalists ang magtigi—unom ka mga lalaki ug unom ka mga babaye—diin usa ang mataktak kada gabii.

Bisan sa kabatan-on pa niining maong indigay, namatud-an na nga nahimo na kining tikanganan sa mga Sugbuanon ug batan-ong talento paingon sa kabantog. Ang unang mananaog nga si Jacky Chang, nalakip kaniadto sa musicserye ni Sarah Geronimo nga “Idol” sa ABS-CBN. Kasamtangan siya nga nahisakop og usa ka Korean production.

Ang mananaog sa milabay nga tuig, Rachelle Mae Faelnar kanunay na nga makita isip performer sa mga fiesta, mall show ug corporate shows. Naaninaw pud siya sa tibuok kalibutan sa iyang pag-awit sa Lupang Hinirang atol sa away ni Rey “Boom-Boom” Bautista ug Heriberto Ruiz diha sa Waterfront Hotel sa milabay nga tuig.

Ang nakanindot sa Sinulog Idol mao nga dili lang puros panagtigi ang mahitabo, kundili may nagkadaiya usab nga mga workshops nga mupalambo pa sa ilang potensyal aron mamahimong dakong bituon ugma damlag. Dugang pa niini, may madawat usab sila nga scholarship gikan sa Center for Pop ug bansayon mismo sa naila na nga “Ultimate Vocal Coach” sa Sugbo nga si Jay Unchuan.

Pwes, kinsa sa 12 ka finalists ang musunod sa mga tunob nila ni Jacky ug Rachelle karong tuiga? Lalaki na kaha ang mugawas nga mananaog? Ania ang unang upat sa 12 ka hopefuls:

1. Rovee Marie Fernandez, 18 years old nga lumulopyo sa Benito Ebuen Airbase, Mactan, Lapulapu City. Siya sophomore student sa kursong AB Linguistics and Literature sa University of San Carlos Talamban.

2. Jem Keziah Keren Felicilda, 16 years old nga taga San Antonio Village, Purok VI, Cubacub, Mandaue City. First year siya sa kursong AB Masscom diha sa University of San Jose-Recoletos.

3. Mark Vincent Seville, 19 years old ug pambato sa Lawaan II, Talisay City. Freshman siya sa kursong BS Information Technology sa Cebu Technological University.

4. Marlon Tansengco, 18 years old nga taga Lomboy St., Banawa Cebu City. Junior BSBA Marketing Management student siya sa Cebu Institute of Technology University.

32nd Cebu Pop

Sugod karong adlawa, sination nato ang mga mugna nga maoy magtigi sa umaabot nga 32nd Cebu Popular Music Festival karong Enero 13, Biyernes, alas otso sa gabii (8pm) diha sa Cebu Coliseum. Ang ticket mapalit diha sa University of the Visayas alumni office sa 2555741. Nagkantidad ang ticket og P300, 200, 100 ug 50.

Ang Grand Prize winner makadawat og P150k, ang Second Placer makadawat og P100k

Ug ang Third Placer may 50k. Samtang ang Best Interpreter makaangkon og P10k ug Qualifying Prize P15k.

Ang Cebu Pop tinuig nga kalihukan ubos sa paningkamot ni First District Representative Eduardo Gullas, isip pagtamod ug pagpalambo sa Sugbuanong Musika. Si Atty. Joseph Baduel maoy project director karong tuiga.

Ania ang unang entry:

BUNGA

Composer/ Lyricist: Fernando Rabutan

Arranger: Nendel Endrina

Interpreter: Marielle Montellano

I

Unsa ba kining gidangatan ta karon

Bunga ba kini sa pagkamasinupakon?

Wala’y pagrespeto sa kinabuhi sa uban

Tungod sa gamay’ng butang kinabuhi gi-utang.

II

Hilak sa inosenti’ng bata’ng naa sa sabakan

“Ma, ayaw ko’g kuhaa, maluoy ka, pakatawha.

Ako nakasabot sa kahimtang mong lisod

Apan ang pagpatay sa kalisod dili tubag”.

Refrain:

Tan-awon ta kuno atong binuhatan

Nalipay ba kaha ang kahitas-an?

Itisok ang maayong liso

Aron mamunga kini ug gugma.

La la la la la la la la la la ….

III

Nakita mo ba ang atong panahon?

Presyo sa palaliton sige’g saka walay hunong

Daghan ang gigutom nihit ang pangkaon

Bunga ba kini sa kahakog sa kaugalingon?

IV

Makalilisang nga katalagman daw dili katuohan

Bagyo, linog, baha, mga pagdahili sa yuta

Siyagit sa kalisang wala nay puloy-anan

Bunga na kini sa atong mga kalapasan.

(repeat refrain)

Sinulog 2012 Schedule of Activities

January 05, 2012 (Thursday)

Opening Salvo: Walk with Jesus

4:00 AM

Assembly Time (Area)

Fuente Osmeña

4:30 AM

Start of Walk-Fuente Osmeña Blvd. – Basilica del Sto. Niño

5:30 AM

Installation of Hermano & Hermana Mayores 2012

(BANAT NEWS)