Krizza motabang sa mga biktima sa baha

CEBU, Philippines - Ang garbo sa Cagayan de Oro nga si Krizza Neri maoy labing una nga grand winner sa singing talent search saGMA-7, ang Protégé: The Battle For The Big Break.

Gipilde sa giila nga “RNB Sistah” nga si Krizza sa Final Battle niadtong Domingo sa gabii mao sila si Lovely Embuscado of Davao ug Lirah Bermudez of Iloilo.

Daghan ang nahugyaw sa mensahe ni Krizza gumikan kay iyang ipaambit sa ubang tawo ang nadaug niya nga one million pesos ug two-bedroom condo unit .        

Matud pa niya nga tabangan niya ang mga biktima sa flash flood sa Mindanao, partikular na ang iyang mga kababayan sa Cagayan de Oro.

Samtang i-share usab ni Kriza ngadto kang Lovely ang nadag-an niya nga condo unit.

"Sa totoo lang po, kung ako, hindi ako kasali rito, gusto kong manalo si Lovely. Kaya po kanina, sinabi ko na willing po ako na i-share kay Lovely. Kasi po, wala naman pong reason na akuin ko lahat 'to,” tsika pa ni Krizza ngadto sa PEP.

Suma pa niya nga wala siya nag-expect nga siya maoy makadaug sa maong kompetisyon gumikan kay kontento na siya kaniadto nga masulod sa Top 10.

"Masarap talaga kapag walang ine-expect,” suma pa ni Krizza.

Nagmaya usab siya og maayo gumikan kay seguradong makabaton gyud siya og trabaho sanglit papirmahon man siya og five-year contract sa GMA Artist Center.

Samtang gipistahan na usab karon sa Youtube ang video ni Krizza kung diin gikanta niya ang RNB song nga Superbass.

Bag-ong kaso

Gipasakaan ni Anabelle Rama og kasong pagpangawat si Nadia Montenegro ug kini iyang giduso kagahapon sa San Juan Prosecutor‘s Office. Suma pa ni Anabelle nga wala mauli ni Nadia ang giuslan niini nga mga gamit nga gikuha niini sa storage sa iyang balay. Giingong nanghulam og sofa si Nadia apan nahibaw-an na lang niya nga duna pa’y ubang butang nga gikuha ang aktres kung diin kantidad niini moabot ngadto sa P400,000.

Kapamilya stars miduaw sa CDO

Mitikang sa Cagayan de Oro sila si Kris Aquino, Angel Locsin, ug Vice Ganda sa miaging adlaw ug mihatag og hinabang ngadto sa mga biktima sa dakong pagbaha sa nahisgutang dapit. Kapin na sa 700 ang nangamatay ug liboan na usab ang missing gumikan sa Bagyong Sendong nga miigo sa pipila ka parte sa Mindanao.

“Habang Buhay” naglawig

Ang awit nga Habang Buhay sa BBS featuring Kean Cipriano maoy nag-una sa listahan sa Myx Hit Chart kung diin hingpit nga gikatigi niini ang Superman sa Super Junior, Halik sa Kamikazee, One Hit Combo sa Parokya ni Edgar featuring Gloc 9 ug All That’s Left ni Christian Bautista.

Segunda Mano gi-promote ni Marian

Gawas sa pag-promote sa Panday 2, gilakip usab ni Marian Rivera sa pag-promote ang pelikula ni Dingdong Dantes nga Segunda Mano. Nagkanayon si Marian nga wala niya huna-hunaa ang kompetisyon busa angayan lang nga suportahan ang mga pambato sa Metro Manila Film Festival 2011.

Pag-sure diha Paolo!

Kanunay nga magbinabaye si Paolo Ballesteros sa nagkadaiya nga segments sa Eat Bulaga sa GMA-7 hinungdan nga wala gihapon mahilom ang taud-taud na nga tsismis nga matud pa usa siya ka mahuyang. Igo lang mokatawa si Paolo kung dunay mangutana kalabot sa iyang gender.

Ethel dili arte

Mahiligon si Ethel Booba sa pag-inom og kape busa daghan ang nahugyaw kaniya sa dihang natural lang siya nga mipalit og kape sa kilid sa tindahan sa dihang miduaw siya sa usa ka dapit sa Probinsiya sa Sugbo dili pa lang dugay.