CEBU, Philippines - Maisip nga de buenas gayud nga tuig alang sa University of the Visayas (UV) Chorale ang 2011. Dili malimod nga mabulukon ug mabungahon. Labing hugyaw niini mao ang ilang paglangkat sa grand prize sa bag-o pa lang gipahigayon nga Manila Broadcasting Company Choral Competition (MBC) sa Aliw Theater sa kaulohan.
Tam-is kadto nga kadaugan alang sa UV Chorale sanglit sila pud ang grand champion sa maong kompetisyon niadtong 2009, apan second placer lamang sila pagka sunod tuig. Hinungdan nga makahuluganon kini alang sa kadaugan nga subli nilang nalangkat ang labing unang pwesto karong tuiga.
Ang open category nga maoy gisalmutan sa UV Chorale ang maisip nga labing giatngan matag tuig sanglit dinhi mag-abot ang mga banggiitang grupo sa mang-aawit gikan sa nagkadaiyang parte sa Pilipinas. Gani kinahanglan pa man nga muagi og rehiyonal nga indigay aron makaangkon og kahigayonan paingon sa grand finals. Ang tanang nisalmot sa open category migahin gayud og oras sa pagkanta sa awit nga “Kampana ng Simbahan”.
Giisip nga crowd favorite ang UV Chorale ug daghan usab ang nahugyaw sa ilang conductor nga si Anna Tabita Abeleda Piquero gumikan sa ka maayo niya nga mangulo sa grupo, diin pinaagi niya mapadayag gayud ang tukmang emosyon nga gipangayo sa matag awit. Ang makalingaw nga rendisyon sa UV Chorale sa “Buttercup” maoy nakapahugyaw sa mga mitan-aw ug ang nindot nga choreography nagtukmod sa mga mitan-aw pagpa-uwan og masipang pakpak.
Giawit usab nila ang “Mabuhi Ka Sugbuanon” nga nakapanimbawot sa balhibo sa mga manan-aw labi na sa mga Sugbuanon nga didto adtong tungora, sama sa CNU Chorale nga nakasulod pud sa semifinal round. Sanglit mga lig-on man ang nagtigi, mga lig-on pud ang naglangkob isip mga hurado. Naglakip kini nila ni Prof. Malou Hermo sa Ateneo Glee Club; actress/comedian Nannette Inventor, kinsa kanhi usab miyembro sa UP Concert Chorus; composer, arranger ug conductor Arnel de Pano; Prof. Fidel Calalang sa UST Singers, Prof Jai Aracama Sabas sa UP Concert Choros; ug Prof. Jonathan Velasco sa Ateneo Chamber Singers.
Samtang sa wala pa ang maong kadaugan, nalakip usab ang UV Chorale concert ni Maestro Ryan Cayabyab sa Araneta Coliseum nga nag-ulohan og “Sang Libo’t Sang Tinig ng Pasko (The Araneta Christmas Special). Mga ilado nga chorale groups sa Pilipinas ang gipaapil sa maong concert.
Nakauban usab sa UV Chorale sa maong concert ang mga big stars/singers nga maoy niawit sa mga komposisyon ni Maestro Cayabyab sama nila ni Lea Salonga, Jed Madela, Angeline Quinto,KC Conception ug Piolo Pascual.
Nakasalmot usab ang UV Chorale sa “MADZ Et Al” affair nga gilangkoban sa mga choir kansang mga conductor nahimong miyembro sa Philippine Madrigal Singers. Mihimo pud ang maong grupo og nagkalain-laing mall shows didto sa Manila.
Pagkakaron nangandam na usab ang UV Chorale alang gikatakda nila nga pagsalmot sa usa ka kompetisyon didto sa Europe sunod tuig.