Taiwanese romantic comedy series magpapa-in love
MANILA, Philippines - Sa pagdating ng Pasko, kapansin-pansin na umuusbong at nangingibabaw ang pagmamahalan sa paligid. Kaya simula kahapon, Lunes (Nov. 28), handog ng GMA 7 ang Love You at Dong Yi, dalawang Asian dramas na siguradong magpapaibig sa mga manonood hapon man o gabi.
Ang Love You, na umeere tuwing hapon, ay isang Taiwanese romantic comedy series na siyang ikalawang installment ng Fated To Love You trilogy.
Kung maraming kinilig noon sa Fated To Love You, na una nang napanood sa GMA 7, inaasahang marami ring matutuwa sa kuwento ng accidental couple na sina JV (Joseph Chang) at Karen (Rainie Yang).
Hangad ng dalawang bida na maging engaged sa kani-kanilang kasintahan — nag-propose si JV sa kanyang girlfriend na model-actress at umaasa naman si Karen na magpo-propose na ang kanyang boyfriend sa pagpunta nila sa Las Vegas. Kaya lang, parehong hindi mangyayari ang kanilang inaasahan.
Upang makalimot sa kabiguan, magpapakalasing silang dalawa sa iisang bar at paggising nila, hindi lamang sila engaged kundi kasal na sa isa’t isa!
Ano kaya ang gagawin nila sa kanilang unexpected marriage? Papanindigan ba nila o sisikaping lusutan ang gulong pinasok?
Sa gabi naman, isang engrandeng epic drama mula sa Korea ang matutunghayan sa GMA Telebabad. Matapos ang kuwento nina Jang Geum, Hwang Jini, at Queen Seon Deok, ipapakilala naman sa telebisyon si Dong Yi.
Gaganap bilang Dong Yi si Han Hyo Joo, na nagbida noon sa Shining Inheritance, at makakatambal niya dito si Ji Jin Hee, ang Korean aktor na gumanap bilang Kapitan Min sa Jewel In The Palace.
Sa Dong Yi, makikita ng mga manonood na hindi ang antas sa lipunan ang magdidikta sa kapalaran ng isang tao. Subaybayan kung paano malalampasan ni Dong Yi ang kanyang mababang kalagayan at kung paano siya makikilala bilang isa sa mga dakilang babae sa Korea.
Pag-ibig at inspirasyon ang handog ng dalawang bagong Asian dramas na ito simula ngayong Lunes, Nov. 28. Ang Love You ay mapapanood Lunes hanggang Biyernes pagkatapos ng Kung Aagawin Mo Ang Langit sa GMA Afternoon Prime at ang Dong Yi naman ay tuwing Lunes hanggang Huwebes ng gabi pagkatapos ng Inside Protégé sa Telebabad ng GMA 7.
- Latest
