"Queen bee"

CEBU, Philippines - Walay masudlan sa kalipay si Miss Spain, Bee Urgello , 25, dihang nakab-ot na niya ang katumanan sa iyang mga pangandoy pinaagi sa pagdughit sa masidlakon nga korona sa Queen Universe atol sa prestihiyosong indigay sa kaanyag, ang Queen:  Pageant for Alternatives 2011, nga gipahigayon niadtong Sabado sa gabii sa Pacific Grand Ballroom sa Waterfront Cebu City Hotel and Casino.

Nagdala sa pangalang Infanta Mariana Victoria de Borbon, nagmaya gyud sa iyang kadaugan si Urgello kay wala gyud siya magdahum nga siya ang makadaug sanglit wala man siya’y nakuha nga award gawas lang sa special award nga Ms. Olive C Skin.

“I felt very blessed to be hailed as this year’s Queen. I made my family and friends proud,” matud pa ni Bee nga usa ka registered nurse kinsa gradwado sa University of Cebu Banilad.

Mao kini ang unang higayon nga nisalmot si Bee og indigay sa kaanyag. Gipili niya nga mosalmot sa Queen kay masaligon siya nga prestihiyoso kini ug kumbinsido siya sa kawsa niini, ilabi na ang pagtabang sa nagkinahanglan pinaagi sa mga charitable institutions nga suportado sa maong pageant.

Mapasalamaton kaayo siya sa iyang pamilya sa ilang full-support kaniya ug sa iyang mga mentors nga naglakip nila ni Binibining Pilipinas-World 2006 Anna Maris Igpit, Miss Earth 2008 Karla Henry ug Miss Cebu Sian Elizabeth Maynard, nga maoy nag-umol gyud ni Bee para makuha ang korona.

Si Ms. Russia, Stacy Kurnikova McBright a.k.a Princess Alexandria Feodorovna Romanova mao ang napiling Queen World samtang si Ms. Greece, Erla Dela Veyga a.k.a Princess Irene Glucksburg maoy Queen International.

Si Ms. Thailand, Honey Lee a.k.a Princess Sunandha Kumariratana ug si Ms. Japan, Megan Young a.k.a Princess Chichibu No Miya, maoy mga runners-up.

Usa sa mga nanghakot og mga special awards si Ms. Russia diin nakuha niya ang Best in Swimsuit ug Best in Evening Gown samtang si Ms. Greece maoy napiling Ms. Ladlad ug Ms. New Placenta.

Ang ubang mga awardees mao sila si Ms. Madagascar Maria Esmeralda nga maoy Best in Funwear ug ang iyang designer nga si PeeWee Senining maoy nakakuha sa Best Designer for Funwear. Ang design ni Jun Escario nga gisul-ob ni Ms. Italy maoy nakapadaog niya isip Best Designer for Evening Gown, Miss Congeniality, Miss Ethiopia RC Velasquez, Miss Photogenic, Miss Indonesia Trish Gonzales, Best in National Royal Costume, Miss Mexico Maria Paula Vega, Best in Costume, Miss Egypt Meg Mascardo ug Miss Scent-J Perfume, Miss Peru Erika Fox.

Dili gyud basta-basta ang Queen 2011 tungod kay mga banggiitan ang mga hurado niini lakip na si Miss Universe 1999 1st runner-up Miriam Quiambao, Divine Lee of Global Asiatique, ang hunk-actor Victor Basa, Angel Aquino, Herve Lampert of Dedon Furniture, Alfred Porten Schlager nga General Manager sa Waterfront, Moussa Abdayem, Eduardo Ngo II, Mary Ann Alcordo-Solomon, Cebu coordinator of the ICanServe Foundation.

Hugyaw pod kaayo ang mga segment hosts niadtong gabhiuna nga gipanguluhan ni Jude Bacalso, Vince Escario ug Bianca Valerio samtang ang King of Talk Show Boy Abunda maoy nidala sa Casual Question and Answer Portion sa top 10 finalists.

Matud pa ni Boy, nga siya mismo ang nagbuluntaryo nga maoy modala sa Q&A, diin impromptu gyud ang mga questions nga iyang gibato sa mga kandidata ala Bottomline.