CEBU, Philippines - Subling gipahimug-atan ni Miss Universe 3rd Runner-up Shamcey Gurrea Supsup ang iyang pagka-arkitekto pinaagi sa pagbalibad sa mga imbitasyon nga pasudlon siyag hingpit sa showbiz.
“I would pursue a career in architecture and construction,” matod niya. “I would like to design bridges.”
Nagkanayon si Shamcey nga dunay karakter ang mga taytayan nga nindot kaayong i-play up kon duwa-duwaan. Ug mamahimo kining dakong tumong inig kahuman na unya sa iyang mga tulumanon ubos sa Binibining Pilipinas Charities, Inc.
Kahinumduman nga Top 1 si Shamcey sa board exam sa Architecture (86.60%) niadtong 2010. Migradwar siya isip Magna Cum Laude (with high honors/distinction) sa UP.
Niya pa nga dili angay mabalaka ang mga fans nga gusto makakita niya permi sa TV kay bisan og dili siya hingpit nga mag-artista, may programa siya puhon nga ipasalida tungod kay mipadayag naman siya nga interesado siya sa hosting stint. Mipatin-aw hinoon siya nga siguradong may kalabotan ni sa Architecture o ba kaha lifestyle magazine show ang format diin labing mohaom ang iyang mga nakat-unan ug kasinatian.
Mituyo pagduaw si Shamcey sa Sugbu aron katambongan ang ika-15 nga anibersaryo sa Coffee Dream, usa ka patigayon nga gipanag-iya ug gidumala ni Glenn Anthony Soco.
Didto gipahigayon ang press conference sa Paseo Arcenas diha sa Banawa sa nakalabay’ng Lunes sa gabii. Giatol kini sa opening and blessing sa Coffee Dream outlet dinha sa Arcenas Estate diin dili lamang kape ang gibaligya karon ning maong “homegrown business.” Lakip na niini ang mga community-based products nga ginama sa mga micro entrepreneurs, sama sa Ginamos Paté (salted fish paste) sa Pilar, Camotes ug camote cookies sa Aloguinsan.
Giangkon ni Shamcey nga mas moinom pa siya’g kape kaysa gatas. “Pero I add milk to my coffee – the mocha variant,” niya pa.
Samtang sa pangutana kun wa ba gyod siya mapikal sa pagbugalbugal sa uban sa iyang apelyido, nagkanayon si Shamcey nga niadto rang bata pa siya apektado niini. “When I was a child I did get affected. But when I grew up, nasanay na ako. Tinatawanan ko na lang. There was a time I had to follow up documents, tapos no’ng tinawag ang name ko, may mga nagtawanan. But when I stood up, bigla silang natahimik.”