CEBU, Philippines - Pag-abot sa tukmang higayon, musugot ang 18 anyos nga PBB Teen Clash big winner James Reid nga magpa-sexy sa iyang mga proyekto-pictorial man o pelikula ubos sa usa ka kondisyon: not below the waist.
Ang Fil-Australian nga si James dinhi sa Sugbo adtong Sabado sa gabii isip celebrity guest sa nagpadayon nga month-long 18 anniversary celebration sa Gaisano Country Mall, diin mipasundayag pud siya diha sa Gaisano Main kauban si Jean Oineza, kinsa midala isip manghod ni Enchong Dee sa Maria la del Barrio sa ABS-CBN.
Si Derek Ramsay ang idolo ni James, hinungdan nga buot niya nga mabaid pa og maayo sa pag-arte aron maabot niya ugma damlag ang kalampusan karon sa uyab ni Angelica Panganiban. Bilib gayud matud pa siya sa abilidad ni Derek, “especially after No Other Woman movie.
Si James ubos sa pagdumala sa Star Magic ug sa manager pud ni Derek nga si Jojie Dingcong. Suma pa niya, sa sinugdanan, magtambag-tambag lang niya si Dingcong unsay angay niyang buhaton, diin gipadayag matud pa niini nga kumbinsido siya sa potensyal ni James nga musikat sa industriya. Hinungdan, nga hingpit na gayud siya nga nagpaco-manage niini, sanglit kumbisido pud si James sa katakus ni Dingcong.
“Also because Star Magic has a lot of artists,” sumpay pa niya sa rason nganong mikuha siya og co-manager. Pagkakaron, nagkat-on siya og Tagalog isip pagpangandam sa iyang umaabot matud pa nga teleserye sa ABS-CBN sunod tuig. Busy usab siya sa promotion sa iyang digital album “We Are Whatever” ubos sa Star Records diin ka-duet niya ang PBB runner-up nga si Bret Jackson. Upat ka mga kanta ang unod niining maong album sama sa “Can’t Dance, While We’re Still Young, Living The Dream ug One Night Romance.” Paborito matud pa niya ang awit nga ‘Can’t Dance” sanglit mao matud pa ni ang labing lingaw sa tanan nilang kanta. Gipasabot pud niya ang “One Night Romance” mahitungod sa pagpangita og seryoso nga relasyon ug dili “one night stand.”
Pero, walay ka relasyon ang 18-anyos nga si James pagkakaron. Rason niya: “I haven’t found someone to be in a relationship with.” Apan buot niya nga makauyab og babaye nga “funny and pretty.”
Samtang naglibog siya og kinsa na gayud ang iyang ka-loveteam tungod kay tulo man ka mga ka-batch niya sa PBB ang gipares ngadto niya sama nila ni Anne Lee, Trisha Santos ug Devon Seron. Aminado hinuon siya nga gihangop ang ilang panagpares ni Devon sa ‘Growing Up” sanglit nagkadaghan ang sumusunod sa Jaevon. Apan wala pa matud pay kasiguruhan kun may follow-up project ba ang ilang team-up sa Sugbuanong si Devon nga gihulagway niya nga higala.