Serbisyong Tinud-anay

Happy 4th Year Anniversary BuenaMano Balita!!!! Medyo uwahi na ang akong pahalipay sa programa nga akong gihigugma ug gihimo nakong kapikas sa akong kinabuhi matag buntag. Wala nako damha nga sa ikaupat nila ka tuig mamahimo akong parte sa maong morning show. Nakahinumdum pa ko sa akong unang adlaw isip guest -host sa BMB kay wala pa ko’y katulog. Gikan ko nagrampa unya sayo kaayo ang call time sa maong programa. Kani laging wala pa ko maanad nga momata og sayo sa buntag, ang ending galipong lipong pa akong show… hahahaha! Ang usa ka semana nga guest-hosting nako sa BMB miabli kanako sa kahigayonan nga mahimong regular host. Pero dili ingon niana kasayon ang akong naagian, ang mga pagsuway nga dapat nako mo desisyon sa akong gitawag nga career. Pero atong panahona nga naglibog ko nisampit ko sa Kahitas-an ug wala nako damha nga mahapsay ang tanan. Mao nga Thank you Lord!

Tungod sa BMB inanay nakong giusab ang akong lifestyle (unsaon?). Kung mo rampa gani ko dapat naay oras nga mauli ko sa akong lungga (boarding house), para makamata ko alas singko sa buntag, kung adunay mohagad og tagay dili nako magpakahubog, pa emote emote lang o dili ko moinom kay maikog ko sa akong partner Ching nga medyo nanimaho pa kog ilimnon nga makahubog. hahhahahaha. Gusto ko nga moatubang sa mga partners namo nga fresh on cam and off cam.

Sa among Anniversary Week naghatag mi og Serbisyong Tinud-anay sama sa pagbisita sa mga barangay ug nanghatag og mga pa premyo. Sa mubong panahon nga nahimo kung kabahin sa maong programa nailaila nako ang tulo ka personalidad nga wala ko nagtuo nga akong maka trabaho ug nahimo nakong mga higala nga sila si Allan Dominggo, Lou Anne Mae Rondina ug siyempre si Partner Ching Pelayo-Dacua. Kung adunay mga higayon nga magkatapok tanan sa studio para sa usa ka hugna sa BMB dili namo kalikayan nga mag BisChika sa make up room, magkinataw-anay ug pictorials galore.

Mapasalamaton kaayo mi sa mga barangay nga among bisitahon kay sa wala’y pagduhaduha ila kaming gipadayon, dili nako ma imagine nga sayo pa lang sa buntag magtikaw-tikaw na ang among team para mo set up sa ilang lugar. Unya andam na ang mga barangay tanod nga motabang kanamo, ang mga kapuso nga sayo kaayo nagtapok para mosaksi sa among live remote. Bisan sa ginagmay namo nga pamaagi matagaan namo sila og kalipay. Sa tinuod lang, tanan namong kahago, kakapoy, mawagtang tanan ang ilang mga singgit, pahiyom, katawa ug gamay nga pakpak makaingon ka nga dili kabayran og pila ka pesos. Mao kini ang usa sa mga core values ... “the viewer is our boss.” Buhaton ang tanan kung unsa ang gusto ug ang kinahanglan sa among mga viewers.

 Hangtud sa sunod na pud nga Anibersaryo sa BuenaMano Balita laumi ninyo nga mas doblehon namo nga ihatod ang mga nag Unang Balita, ang mga pakatawa ni Inday Gemma, ang mga Kasayuran sa Nasayod Ka Ba? Ang mga banat ni Super Bobby Nalzaro, ang mga pulong sa Diyos pinaagi ni Father Dan ug siyempre ang mga nag-init init ug nagbukal-bukal nga mga Showbiz Chika. Kining tanan para lang gyud kaninyo. Salamat sa upat ka tuig ang BuenaMano Balita dili lang kini ninyo suki, ug partner, apan inyo nang gihimong kabahin sa inyong morning!

Atangi Next Week: Ang Pagrampa sa inyong Yur’s truly sa Camiguin Island.