P100 M na ang No Other Woman

CEBU, Philippines - Gikatahong P100 million na ang gross sales sa Star Cinema movie “No Other Woman” suma pa sa press release kagahapon. Kini samtang padayon ang taho nga SRO kon standing room only pa gihapon ang sitwasyon sa nagkadaiyang sinehan sa Pilipinas gumikan sa kadaghang buot makakita sa pelikula nila ni Cristine Reyes, Derek Ramsay, ug Anne Curtis.

Joey mo-guest sa Kapamilya shows

Gikatakdang mo-guest puhon ang Kapuso star nga si Joey de Leon sa nagkadaiyang programa sa ABS-CBN gumikan kay kabahin kini sa promosyon sa umaabot niya nga pelikula nila ni Sarah Geronimo ug Gerald Anderson. Si Joey maoy modala isip amahan ni Sarah sa nahisgutang movie project.

Nadia gidumtan na

Suma pa ni Ruffa Guttierez nga naglagot pag-ayo ang tibuok niya nga pamilya ngadto kang Nadia Montenegro kinsa mipasaka og kasong child abuse ngadto sa iyang inahan nga si Annabelle Rama. Suma pa ni Ruffa nga si Nadia pa ang sige’g hangyo sa iyang inahan kaniadto nga pasudlon sa showbiz ang mga anak niini busa wala siya magdahom nga mao kini ang ibalos kanila.

Louise napungot sa intriga

Napungot si Louise delos Reyes sa intri­ga nga matud pa nga usa lang siya ka sinagop nga bata. Kahinumduman nga mitumaw ang maong isyu gumikan sa iyang pagka-mestisa . Depensa pa sa aktres nga segurado siya nga dili siya sinagop busa wala siya mahimuot sa maong intriga.

Budoy sa October 10

Karong October 10 na makita sa primetime bida sa ABS-CBN ang advocacy series nga “Budoy” starring Gerald Anderson, diin suwayan ang chemistry nilang duha ni Jessy Mendiola isip iyang leading lady. Kini pud ang labing unang proyekto ni Janice de Belen sa iyang pagbalik sa ABS-CBN ug comeback teleseries ni Zsa Zsa Padilla kinsa wala na muhimo og serye pipila na ka tuig ang milabay.

Albie: “I just want to be remembered not in a bad way”

“Paulo (Avelino) and Diego (Loyzaga) are my only friends in showbiz. Most of my friends are in La Salle.”

Kini suma pa sa kontrobersyal nga young star nga si Albie Casiño, kinsa dinhi sa Sugbo adtong Sabado kauban ang maanyag nga si Coleen Luna, isip pasiunang celebrity guests sa usa ka buwan nga selebrasyon sa 18th Anniversary sa Gaisano Country Mall, diin midalikyat sila sa Balamban Town Center pagka hapon ug gihugpan sa mga Balambanon.

Sa pag-abot pa sa mga piniling sakop sa E-Group (Entertainment Group) sa hamugaway nga Lighthouse restaurant sa General Maxilum Avenue alang sa lamiang paniudto kauban ang mga artista, may mga komedya na nga walay pangutana nga ibato ngadto kang Albie kabahin sa isyu niini ug ni Andi Eigenman. Nga gitubag sa Banat News Hugyaw nga, dili na kinahanglang mangutana pa sanglit nahibaw-an nang daan unsay itubag ni Albie: no comment. Nagkataw-anay ang tanan.

Namatud-an nga ang 18-anyos nga si Albie labihan ka prangka nga batan-on. Dihang gipangutana sa Banat News Hugyaw kun nganong duha ra ka buok higala niya sa showbiz sa kadaghang artista, tubag niya: because I’m here to work.

Ang kanhi mga kauban niya sa toprating teleserye Mara Clara nga sila si Julia Montes ug Kathryn Bernardo, dili niya mga higala tungod kay,” oh, they are my sisters.”

Alang kang Albie, showbiz gayud maoy iyang gusto ug bisan pa man sa kontrobersiya nga iyang nalambigitan, wala misantop sa iyang hunahuna nga mubiya sa industriya nga iyang gihigugma.

“I don’t want to do anything I don’t want to do,” rason pa niya.

Sa pangutana asa ug unsa na siya lima ka tuig gikan karon, tubag niya, “I don’t know.” Ug ang rason mao nga: “I don’t really plan. I just do it day by day.”

Pwes nganong ingon niini man ang iyang prinsipyo sa kinabuhi? “Because you’re not even sure if the sun is gonna shine tomorrow.’

Si Albie ang matang sa batan-on nga musulti gayud kun unsay buot niyang isulti. Gani, hulagway pa niya sa iyang kaugalingon: I’m very affront. I go where I wanna go. I’m friendly and I wanna have fun.”

Kun babaye ang hisgutan, type niya ang “matalino and funny.”

Apan kun unsa siya kaisog kun hinabion, sukwahi pud kaayo kun naa na siya sa entablado tungod kay mugawas ang iyang pagka mauwawon ug pagka inosente. Sama na lang pananglit sa nahitabo sa entablado sa Balamban Town Center dihang namuwa si Albie dihang gibirigan og tulo ka mga babaye. Misamot dihang usa lang ka babaye ang nahibilin sa entablado, kinsa maoy midaog sa dance challenge, tungod kay nagpangikod pa siya og gunit sa kamot sa dalaga.

Makadaghan niya gibiyaan sa tunga ang dalaga ug mas gipili na lang nga makiglamano ug mutimbaya sa nagpunsisok sa isig ka kilid sa entablado. Mismong ang mommy ni Albie na maoy nagsige og sinyas unsay angay niyang buhaton, diin mipahiyom nalang siya hinungdan nga napikot na iyang mga mata ug ‘chinito” na siya’g dagway.

Pero kun siya maoy papilion, how does he like to be remembered in showbiz? Naamang siya makadiyot, dayong ingon: wow, that’s a hard question. Ug sa tantong hunahuna niya og unsay angay niyang itubag nakahimo siya pag-ingon nga: “To just be remembered is a good thing, sa daming mga artista.” Ug gitapos niya sa pag-ingon: “I just want to be remembered not in a bad way.”…