Maria ug Thia magtigi sa bukton ni Pacquiao-Marguez

CEBU, Philippines - Duha ka garbo sa mga Pinoy ang giingong manganta alang sa umaabot nga fight nila ni Manny Pacquiao ug Juan Miguel Marquez karong November 12 sa Las Vegas.

Kini naglangkob sa YouTube sensation nga si Maria Aragon ug ang kanhi finalist sa American Idol season 10 nga si Thia Megia.

Naghinam-hinam na pag-ayo ang katawhan alang sa pag-awit ni Maria alang sa “Lupang Hinirang” samtang si Thia maoy moawit sa national anthem sa Amerika nga “Star Spangled Banner”.

Kahinumduman nga nagmalampuson si Maria sa pagbisita sa buhatan sa National Historical Institute (NHI) kung diin iyang gipabati sa mga opisyal sa maong ahensya ang iyang version sa Lupang Hinirang.

Misamot karon kasikat si Maria gumikan sa mga video nga iyang gipang-upload sa Youtube ug mihimo og nagkadaiyang version sa sikat nga mga kanta karon sama sa Terrified ni Katharine Mcphee ug Just The Way You Are ni Bruno Mars.

Adopted gud tawn!

Gisalikway ni Louise delos Reyes ang tweet nga matud pa ‘adopted” o sinagop siya. Suma pa niya, imposibli ang maong pangankon sanglit susama siya og dagway sa iyang mga ig-agaw ug mga iyaan. Gawas pa sa balay nila siya gihimugso.

Bea gimingaw sa iyang papa

Mabulukon ang career ni Bea Binene sa GMA-7 sanglit tulo ka buok ang iyang shows: Tween Hearts, Party Pilipinas, ug Pahiram ng Isang Ina. Pero luyo niining tanan ang kagul-anan sanglit mga tulo ka tuig na siyang walay komunikasyon sa iyang papa, nga mibiya nila adtong Father’s Day.

Valerie ganahan mag-noontime show

Gimingaw na si Valerie Concepcion sa noontime show nga kada adlaw gyud siya magtrabaho. Pero no comment siya sa posibilidad nga kuhaon pud siya ni Willie Revillame sama sa gikatakdang paglayat ni Mariel Rodriguez paingon sa TV5. Matud niya walay offer si Willie niya o ang TV5 busa tak-om lang una siya.

Confident ni Dondon

Tulo ka tuig na ang relasyon nila ni Dondon Hontiveros ug Valerie Concepcion, ug suma pa sa actress, never nga nag-away sila sa basketbolista tungod sa babaye. Confident matud pa siya sa ilang relasyon ni Dondon ug kun ugaling dili sila magkadayon, nagpasabot lamang kini nga dili sila para sa usa’g-usa.

Jiro hapit na makagawas

Unom ka buwan pa ang paabuton una makagawas gikan sa usa ka drug rehabilitation facility didto sa Antipolo, City ang award-winning young actor nga si Jiro Manio. Suma pa nga nakatunga na si Jiro sa iyang rehab program. Kahinumduman nga 2009 dihang gipapas siya sa listahan sa Star Magic talents ug gitangtang sa toprating serye ‘Tayong Dalawa” tungod sa pasangil nga “pasaway” siya.

Ganahan mag-artista

Interesado ang manag-uyab nga Hazel Chua ug Raffy Tan nga musulod sa showbiz kun may offer sa higayon nga matapos na ang Pinoy Biggest Loser, diin lakip sila sa labing dako og naiban nga timbang. Sa pangutana kun magminyo na ba sila, nangatawa ang duruha ug miingon nga mag-enjoy una sila isip manag-uyab, unya na ang hisgutanan sa kaminyuon.

PNoy linya sa kanta ang reaksyon sa engagement

Hingpit na nga mi-react si President Benigno "Noynoy" Aquino III kabahin sa engagement sa kanhi niya uyab nga si Valenzuela Councilor Shalani Soledad ngadto kang Pasig Rep. Roman Romulo.

"You know I like the song 'Got to Believe in Magic.' There's this line there that says 'Tell me how two people find each other.' Well now she found someone. Ako kasi tinatanong ko pa din sa sarili ko how do people find each other? Siya nasagot na niya," nagkanayon siya.

Giangkon ni PNoy nga kaila siya sa pamilyang Romulo apan wala siya mitubag sa pangutana kun mutambong ba siya tungod kay wala matud pay tukma nga tubag alang niini.

"Kapag sinagot ko ang tanung mong 'yan para ko namang sinabi na imbitahin nyo ako. Pag sinabi ko di ako dadalo parang sasabihin nyo may sama ako ng loob... walang tamang sagot dyan," pasabot niya.

Pinay nang-interview og Hollywood Stars

Ang pinay nga katabang ni Ellen DeGeneres   nga si Luzviminda “Mindy” Casimiro maoy gipa-interview sa mga mananaug sa bag-ohay lang nga 63rd Primetime Emmy Awards.

Si Mindy nailhan na pag-ayo sukad nakaangkon siya og segment sa Ellen DeGeneres   Show nga gitawag og "Mindy Movie Minute” hangtud naabot ang panahon nga mohatag na siya og mga opinyon sa American TV shows pinaagi sa segment nga "Mindy's Reality Roundup."

Suma pa sa Asian Journal, si Mindy usa ka pure nga Filipino nga nagikan sa Tarlac. Ang iyang bana nga si Joel "Boyet" Casimiro nagtrabaho gihapon kang Ellen isip driver.

Ang duha nagtrabaho na kang Ellen sukad pa sa upat ka tuig ang milabay.

Labing bag-o nga assignment ni Mindy mao ang pag-interview niya sa nagkadaiyang Hollywood stars

Kini sama nila Jim Parsons, Melissa McCarthy, Julie Bowen, Ty Burrell ug Guy Pearce.