CEBU, Philippines - Usa si Angel Locsin sa miduyog sa kasubo sa magsuong Phil ug James Younghusband kinsa ang nipanaw nila nga inahan nga si Susan Placer-Younghusband gilubong na kagahapon sa Heritage Park sa Taguig.
Sila si Bubbles Paraiso, Gab Valenciano ug ang mga sakop sa Azkals ang pipila lang sa sikat nga mga personalidad nga mihatud kagahapon sa lubong.
Si Angel usab ang nagpahid sa mga luha sa kinamanghoran nga igsoun ni Phil nga si Keri.
Samtang nagkinuptanay sa ilang kamot sila si Angel ug Phil sa pagsulod na nila sa menteryo.
Nasayran usab nga puwerting hilaka ni Angel sa gipahigayong necrological service sa chapel sa Heritage Park.
Emosyonal ang mga tawo samtang gipakita ang AVP presentation kung diin gipakita ang mga hulgway sa magsuong James, Phil ug Keri uban sa ilang inahan.
Wala nagpa-interview ang magsuon ngadto sa media sanglit naa pa sila sa panahon sa pagbangotan.
Bisan pa man sa ilang pagbangotan sa kamatayon sa ilang inahan, gipadayag sa higala sa magsuong Younghusband nga si Jojo Durian nga mopadayon gihapon sa ilang duwa ang maong managsuon sa umaabot nga duwa sa Azkals didto sa Taiwan karong September 30.