MANILA, Philippines - Sa pagpapatuloy ng kuwento sa Sisid tuwing hapon sa GMA 7, maililigtas ni Sig si Eden mula kay Ahmed. Maglalaban ang dalawa habang patatakasin ni Sig si Eden. Sa paglalaban ay masusunog ang kubong kinaroroonan nila. Mawawalan ng malay si Sig at makakatakas naman si Ahmed. Makakalabas si Sig sa nasusunog na kubo pero mawawalan ito ng malay.
Sa pagtakas naman ni Ahmed ay makakabalik ito kina Ramon at palalabasin nito na nagtanan sina Sig at Eden. Lubos na magagalit si Ramon at iuutos sa kanyang mga tauhan na ibalik sa kanya sina Sig at Eden. Makukuha ng mga tauhan ni Ramon sina Sig at Eden. Hanggang sa makaharap ni Ramon ang dalawa. At sa tindi ng galit nito ay tututukan nito ng baril si Sig. Mapatay na nga kaya ng tuluyan ang binata?
Mapipigilan ni Eden si Ramon pero ’di nito mapipigilan ang galit ni Ramon kaya’t ikukulong nito si Sig, pati na si Eden. Labis na maghihirap ang dalawa sa kanilang situwasyon higit lalo ang lalaki na pagdidiskitahan pa ni Ahmed. Dahil hawak ni Ramon ang kuya niya ay pagbabalakan naman ni Sam na iligtas ito. Kukuha siya ng baril at magbabalak na pumunta kay Ramon. Maligtas kaya ni Sam si Sig?
Dahil naman sa kaguluhang nangyayari ay ito na ang maiisip ni Perla na tamang panahon para kunin ang perlante mula kay Eden. Subalit matutuklasan ni Ahmed ang planong ito at hindi siya papayag na ’di siya kasama sa plano. Ipagpipilitan naman ni Eden kay Ramon na walang kasalanan si Sig at si Ahmed talaga ang tumangay sa kanya. Ayaw pa ring maniwala ni Ramon. Muli nitong pupuntahan si Sig na may dalang baril at kasama pa niya si Ahmed dito. Makakarinig ng putok ng baril si Eden at agad na pupuntahan si Sig at magugulat siya na sa halip na si Sig ay si Ahmed ang binaril ni Ramon!
Si Ahmed ang binaril ni Ramon dahil alam niyang nagsisinungaling ito sa kanya. Pupuwersahin ni Ramon sina Ahmed at Frida na humingi ng tawad kay Eden. Habang nangyayari naman ang lahat ng ito ay hahanapin ni Perla ang perlante sa bahay at tuluyang makikita na niya ito. Makakaalis naman sina Frida at Ahmed mula kina Eden nang pagbalingan ni Ramon ng galit si Sig.