PIK: Tinanong namin si Marvin Agustin kung dadalo ito sa kasal nina Jolina Magdangal at Mark Escueta kung sakaling imbitahan siya.
“Kung ako ang kakanta,” pabiro nitong sagot na obvious na wala siyang balak na dumalo.
Sinabi naman noon ni Jolens na napag-usapan nila ni Mark na wala silang iimbitahang mga ex-boyfriend o ex-girlfriend nila kahit kaibigan na nila ang mga ito.
Feeling ni Jolina, moment nila ’yun at hindi na kailangang makieksena pa ang mga nakaraang relasyon.
Para hindi na lang mailang sa isa’t isa, mabuting wala na ang kahit sinong ex nila.
In fairness naman kay Mark, hindi naman siya naiilang kay Marvin dahil tanggap na niyang naging bahagi na ng career ng kanyang bride-to-be si Marvin at lalo na ngayong magsasama pa sila uli sa bagong Telebabad ng GMA 7 na Iglot.
Mamayang gabi na magsisimula ang Iglot pagkatapos ng 24 Oras.
PAK: Totoo kayang ayaw magpatawag ni Imelda Papin ng Imelda lang kundi dapat ay Ms. Papin?
Narinig ko lamang ’yun sa ilang staff ng Protégé dahil talagang tumataginting na Ms. Papin ang tawag sa kanya.
Isa sa mga mentors si Ms. Papin na talagang kinakarir na ngayon ang gagawin niya sa Protégé dahil hindi maiwasang makipagtalbugan ito kay Claire dela Fuente na isa rin sa mga mentors.
Silang dalawa ang kaabang-abang sa bagong singing competition na ito ng GMA 7 na magsisimula na sa Sept. 4.
BOOM: Wagi ang Rugby team ng ating bansa na Philippine Volcanoes sa Men’s Asian Football Rugby Union na ginanap sa Shanghai, China nung nakaraang linggo.
Natalo nila ang team ng United Arab Emirates at ang pinakahuli ay ang team ng Korea.
Malaki ang tsansang makakapasok sila sa finals at aabot sila sa pinakamimithi nilang Asian 5 Nations Premier Division ng International Rugby Board hanggang sa Rugby World Cup Qualification sa 2013.
Hindi maiwasang naikukumpara sila sa Philippine Azkals pero mukhang mas malakas sila at marami silang mapapanalunan na magbibigay karangalan sa ating bansa.
Malaki ang paghanga nila sa Azkals pero mukhang mas malakas itong Volcanoes kaya dumadami na ang mga fans nila na dati ay nagkakagulo sa Azkals.