MANILA, Philippines - Buong pagmamalaki at karangalang nakatindig sina Senador Ramon “Bong” Revilla Jr. (kanan) at Cavite Governor Juanito ‘‘Johnvic’’ Remulla Jr. (kaliwa) sa likod ng kanilang mga amang sina dating Senador at kasalukuyang Philippine Reclamation Authority Chairman Ramon Revilla Sr. at dating Cavite Governor Juanito ‘‘Johnny’’ Remulla Sr. pagkatapos ng awarding ceremonies ng Gawad Miong na ginanap kamakailan sa Taal Vista Hotel sa Tagaytay City.
Ang matalik na magkaibigang si Revilla Sr. at Remulla Sr., na minsan na ring nagkahiwalay bunsod sa hindi pagkakaunawaang-pulitikal, ay kapwa ginawaran ng nabanggit na parangal bilang pagkilala sa kanilang ‘di matatawarang paglilingkod sa kanilang mga kababayan at napakalaking kontribusyon sa kaunlarang pang-ekonomiya ng kanilang tinubuang lalawigan. Sa kanilang rekonsilyasyon, nanindigan ang kasalukuyang mambabatas na Revilla at punong-lalawigan na Remulla na sisikaping tumibay pa ang ugnayan nila at ipagpapatuloy ang pamana ng kanilang mga ama bilang mga pundasyon ng Cavite sa makabagong panahon. Ang pangalang Gawad Miong ay hango sa palayaw ng Kabitenyong lider ng himagsikan at kauna-unahang Pangulo ng Republika na si Heneral Emilio Aguinaldo.