CEBU, Philippines - Si Cinemalaya best-actor winner Edgar Allan Guzman ang pares ni Kim Chiu sa special episode sa “Maalaala Mo Kaya” nga gi-tape niadtong Martes sa gabii sa Paranaque. Si Cathy Garcia-Molina ang ilang direktor.
Travel show ni Aga
“Pinoy Explorer” title sa round-the-world adventure show ni Aga Muhlach sa TV5. Musuroy matud pa si Aga sa nagkadaiyang dapit sa kalibutan ug gastuhan gyud og maayo sa Kapatid network ang iyang show. Birthday ni Aga ugma, August 12.
P20 M ang kita sa “Babae”
Mihipos matud pa og P20 million gross ang indie film “Ang Babae sa Septic Tank” sulod sa lima ka adlaw nga pagsalida. Kini suma pa sa executive producer sa pelikula, Atty. Joji Alonso. Si Eugene Dominggo ang bida niini, diin midaog siya og Best Actress award gikan sa 7th Cinemalaya Festival alang sa maong pelikula niining bag-o lang.
La Aunor manghugyaw gyud
Ang mini-series “Sa Ngalan ng Ina” sa TV5 matud pa maoy mupaila kang Nora Aunor ngadto sa bag-ong henerasyon. Kini maoy gipaneguro sa Kapatid network, sanglit hugyaw gyud matud pa ang istorya niini ug mapakita gyud unsa ka maayo mu-arte ug nganong gitawag nga Superstar si La Aunor.
Joseph na-aksidente
Nabanggaan og 10-wheeler truck ang gisakyan nga van ni Joseph Bitangcol kagahapon didto sa Antipolo. Kasamtangan siyang gi-obserbahan sa Amang Rodriguez Medical Center sa Marikina City lakip na ang lima pa niya ka mga kauban atol sa aksidente.
Segunda Mano sugdan na
Sunod semana na magsugod ang shooting ni Kris Aquino para sa pelikula nga “Segunda Mano” nga entry sa Metro Manila Film Festival karong December. Si Dingdong Dantes maoy pares ni Kris ug ubos kini sa MJM Productions. Giingong apil pud si Angelica Panganiban niining maong horror movie.
Claudine ug Juday walay communication
Walay komunikasyon sila si Judy Ann Santos ug Claudine Barreto. Pasabot ni Juday sa presscon sa “Junior Master Chef” kagahapon, kini tungod kay dili man gyud sila suod nga managhigala ni Claudine. “Tamang magkaibigan lang kami,” nagkanayon si Juday. Si Claudine ug Juday maoy kanhi gisabong isip mga pambato sa ABS-CBN.
Anne ‘Princess of All Media?”
Kung si Kris Aquino maoy “Queen of All Media” si Showtime host Anne Curtis matud pa maoy “Princess of All Media.” Gumikan niini nagpasalamat si Anne sa iyang mga fans kagahapon pinaagi sa Twitter tungod kay kung wala matud pa ang suporta nila, dili siya mahiabot sa iyang nahimutangan karon.
TVC ni Sam Pinto
Dunay bag-ong product endorsement si 2011 FHM Sexiest Sam Pinto. Nagdumili siya pagbutyag unsa nga produkto, pero gibutyag niya nga kagahapon gi-shoot ang TV commercial alang niini.
Last Big Challenge
Last taping na kagahapon alang sa katapusang “Big Challenge” sa The Biggest Loser Pinoy Edition sa ABS-CBN didto sa Batangas. Si Derek Ramsay maoy didto sanglit siya man ang challenge host.
Finale gahapon pa gimugna
Taping pud kagahapon sa finale scene sa ‘Mula Sa Puso” remake sa ABS-CBN starring Lauren Young, Enrique Gil ug JM de Guzman. Ugma na mahuman ang nahisgutang serye ug hulipan kini sa Maria La Del Barrio nila ni Enchong Dee ug Erich Gonzales karong Lunes.