CEBU, Philippines - Si Angel Locsin gyud maoy may labing daghan og followers sa iyang fan page. Mikabat na sila og 2,352,452! Gipildi pa niya si President Noynoy Aquino nga may 2,145,928 followers lang. Kini suma pa sa famecount.com.
Pasok si Cristine
Nahugyaw si Ping Medina kagahapon human niya masayri nga mikabat na ngadto sa 1.7 million likes ang nadawat sa fan page ni Cristine Reyes sa Facebook. Dagway nila ni Cristine ug Rayver Cruz ang profile picture sa maong account.
Eugene ang “Crossover Queen”
“The Crossover Queen” ang gusto nga titulo ni Eugene Dominggo sa iyang kaugalingon. Kini maoy tubag niya ngadto ni Joey de Leon sa Startalk sa GMA-7 kagahapon. Matud niya, haom ang maong titulo niya sanglit makatabok siya bisan asa nga estasyon ug mahimo pud siya bisan unsa nga medium—stage play, movie, TV.
Mipahuway ra si Mark
Buot lamang matud pa nga ipakita ni Mark Herras sa publiko nga igo lang siya nga mipahuway makadiyot sa iyang pag-artista, apan karon balik na siya pinaagi sa usa ka hugyaw nga project, ang danserye “Time of My Life” nga mulugwa na sa GMA-7 ugma puhon sa primetime.
Mario O’Hara direktor ni Nora
May guest role matud pa si Eugene Dominggo sa gitakdang mini-series ni Superstar Nora Aunor sa TV5. Ang banggiitang direktor nga si Mario O’ Hara matud pa maoy direktor niining project ni Nora sa Kapatid Network. Karong Martes, August 2, giingong mupauli na gyud si La Aunor sa Pilipinas human sa walo ka tuig nga pag-istar sa Amerika.
Carmina nag-taping na
First taping day ni Carmina Villaroel kagahapon para sa “Pahiram ng Isang Ina” ang soap sa GMA-7 nga mupalig-on sa loveteam sa tweens nga sila si Bea Binene ug Jhake Vargas. Sunod buwan na kini mulugwa sa afternoon block.
Kiray nataypan gyud
Apil gihapon si Kiray sa youth-oriented show sa ABS-CBN, “Growing Up” diin bida sila si Julia Montes ug Kathryn Bernardo. Kahinumduman nga managsama silang tulo nga misikat og maayo tungod sa ilang gipakitang maayong labok sa malampuson kaayo nga “Mara Clara” remake.
Way Back Home
Karong August 17, na isalida ang pelikula nga “Way Back Home,” sa Star Cinema. Kining maong proyekto maoy musukod unsa gyud ka lig-on ang kabantogan nila ni Julia Montes ug Kathryn Bernardo nga unang gihangop sa publiko pinaagi sa malampusong “Mara Clara” remake sa ABS-CBN. Sila si Sam Concepcion ug Enrique Gil ang pares sa duruha.
Bahala mo diha!
Wala na magtagad si Jessy Mendiola sa Kimerald fans nga nagpunay og suwat niya aron pasakitan siya, sanglit wala sila makauyon niya isip leading lady ni Gerald Anderson sa umaabot nga teleserye sa ABS-CBN, Budoy.
Naglami na gyud
Naglaom sila si Zanjoe Marudo ug Bea Alonzo nga magmalungtaron ang ilang relasyon. Para ni Zanjoe, si Bea ang matang sa babaye nga panghangtud sa hangtud na gyud.
Andi happy, secure
Gipadayag ni Andi Eigenman nga maayo ra kaayo ang iyang kahimtang sa iyang pagmabdos karon. Mapasalamaton siya sa production people sa Minsan Lang Kita Iibigin sanglit giampingan ug gisuportahan gyud siya atol sa ilang taping.
Rob Gier Trending sa Twitter
Nagkagubot ang mga babaye ug bayot kagahapon sa paglugwa sa pipila ka mga sakop sa Philippine Azkals sa Happy Yipee Yehey. Labing gikagubtan nilang tanan mao si Rob Gier. Gani, trending man siya sa Twitter worldwide kagahapon sa hapon.
Robert James Dazo Gier ang tinuod niyang ngalan ug nahimugso siya niadtong January 6, 1981 didto sa Ascot, England. Si Rob may gitas-on nga 5’10.
Usa siya ka English –Filipino footballer nga nagsugod sa iyang football career didto sa Wimbledon niadtong 1999. Nasakop siya sa Philippine national team niadtong March 2009, para sa 2010 AFC Challenge Cup qualifiers niadtong April.