MANILA, Philippines - Dahil sa sinabi sa kanya ni Alona, tuluyan nang nakipaghiwalay si Eden kay Sig. Mas nanaisin na lang daw ni Eden na hanapin ang nanay niya kesa makipagbalikan kay Sig. Subalit hindi titigil si Sig sa panunuyo kay Eden.
Samantala, magkukrus ang landas ni Alona at ni Alicia. Papaniwalain ni Alona si Alicia na alam nito kung nasaan si Eden. Mapaniwala kaya at sumama si Alicia? Mahanap pa kaya ni Eden si Alicia bago ito tuluyang mailayo muli sa kanya ni Alona?
Magtutulong sina Sig at Eden na hanapin si Alicia subalit naitakas na ito ni Alona. Magdududa tuloy si Eden kung talagang alam ni Sig kung nasaan si Alicia o nag-iimbento lang ito. Magdududa naman si Sig kung may kinalaman sina Alona at Segismundo sa biglaang pagkawala ni Alicia.
Samantala, dadalhin ni Alona si Alicia sa isang malayong lugar at pahihirapan. Paano kapag nalaman ni Eden na may kumidnap sa kanyang ina at iisa ang hinihinging kapalit ng mga ito, ang Perlante.
Magdedesisyon si Eden na kunin ang perlante para mabawi ang kanyang ina. Matutuklasan naman ni Ahmed na tinatago nina Perla si Alicia subalit sa halip na sabihin ito kay Eden ay ililihim pa niya ito sa paniniwalang mas mapupunta sa kanya si Eden sa ibang paraan. Samantala, dahil nagdududa na sa kanyang mga magulang ay magsisimulang mag-imbestiga si Sig sa pagkawala ni Alicia. At gagamitin niya si Monique upang mas mapalapit siya kay Alona at malaman kung ano talaga ang pinaplano nito.
Babalik si Eden sa isla kasama si Ahmed para sisirin ang Perlante subalit mahanap kaya ito bago pa maging huli ang lahat? Sa Maynila, kahit hirap sa pang-aapi nina Perla at Frida ay magagawang tumakas ni Alicia. Mahanap kaya siya ni Sig bago pa tuluyang ipapatay ito ni Alona? Matuklasan na kaya ni Sig ang totoo na ang kanyang mga magulang ang dumukot kay Alicia?
Ito ang mga maiinit na eksena na mangyayari sa nangungunang Sisid ng GMA 7 na pinagbibidahan ni Jackie Rice sa direksiyon ni Ricky Davao.