Akala namin ay smooth na ang mga negosyo ng mag-asawang ito na kilala sa showbiz bilang magagaling na artista. Nakapagpundar sila ng kabuhayan at nakaipon ng pera para makapagpatayo ng negosyo.
Pero nagtataka kami kung bakit hanggang ngayon pala ay hindi pa nila nababayaran ang pagkakautang sa sikat na TV host na kaibigan nila.
Kailangan din kasi ng TV host ang pera kaya lang hindi na yata nakabawi sa kanilang mga negosyo ang mag-asawang celebrity kaya hindi sila makabayad-bayad ng pagkakautang sa TV host.
Mind master hindi epektib sa lotto
Tunay na kamangha-mangha ang ipinamalas na galing ng mind master na si Nomer Lasala nang kumuha ito sa audience na isang dalaga na huhulaan niya. Meron kasing relaxation technique na gagamitan ng hipnotismo. Pagkatapos ay tinanong nito ang pangalan ng aso niya. May isinulat si Nomer sa flashcard.
Sinagot ng dalaga na Jasmine ang pangalan ng aso at nang ipakita ni Nomer ang flashcard ay Jasmine din ang nakasulat dun.
Ang galing niya talaga! Pero nang tanungin namin kung nahuhulaan ba niya ang mga numerong mananalo sa lotto, ito ang sagot niya: “Hindi puwede kasi tao lang ang puwede kong basahan ng pag-iisip hindi ang lotto na operated by machine.”
Gusto ni Nomer na maging kliyente si Solenn Heussaff dahil napaka-intelihente niyang artista.
Gusto rin niya si Marian Rivera
Nang klaruhin ito sa amin, sinabi ng mind master na mahirap matarok ang kalooban ng aktres, nami-misinterpet na pasaway pero hindi naman dahil malambot din ang puso at marunong makisama.
Tatakbo ng six seasons ang programang Mind Master na mapapanood tuwing Linggo.
Pasasalamat…
Naging matagumpay ang aming medical-dental mission na idinaos sa Talisay, Batangas sa pakikipag-ugnayan kay Kuya Daniel Razon at UNTV.
Salamat kay Gov. Vilma Santos na nagpadala ng mga pagkain at walang sawang tumutulong sa Movie Writers Welfare Foundation. Ganoon din sa Sangguniang Bayan ng Talisay lalo na sa butihing mayor na si Dr. Zenaida Mendoza.