Viva ug ABS-CBN interesado Ni Muriel

CEBU, Philippines - Interesado matud pa ang Viva Artist Agency ug ABS-CBN kang 2011 Ms. Philippines-Water Muriel Orais, suma pa sa CEO sa Psalmstre Enterprises nga si Jaime “Jim” Acosta, kinsa mao karon ang co-manager sa maanyag nga garbo sa Sugbo.

Pero nasayran nga dili pa mahimong mag-artista si Muriel tungod kay duna pa kini 15 ka buwan nga kontrata sa Carousel Productions, ang producer sa Miss Philippines-Earth.

Matud ni Acosta atol sa presscon nga gipahinungod alang kang Muriel diha sa Gerry’s Grill sa Ayala Terraces, niadtong Lunes nakadawat siya og tawag gikan sa usa ka Viva agent og mipadayag sa ilang interes sa beauty-queen.

Dungan niini, giangkon ni Muriel nga makadaghan na gyud siya nakadawat og komentaryo nga anggid sila og nawong ni Kim ChIu. Dinhi iyang gipadayag nga nagkaistorya sila ni Kim didto sa Manila, ug puno siya sa pagdayeg sa nahisgutang garbo pud sa Sugbo tungod kay “she’s nice and pretty kaayo.”

Ang Carousel ug si Acosta maoy nagdumala karon sa career ni Muriel didto sa Manila sanglit, ang dalaga man maoy brand ambassador sa Olive-C beauty products human usab siya midaog sa nationwide campus model search sa maong produkto.

Gani dako ang pasalamat ni Muriel kang Acosta tungod kay mao gyud matud pa kini ang nagdasig ug todo nga misuporta sa iyang pagsalmot sa Miss Philippines-Earth.

Gipadayag niya nga labihan gyud ang iyang kalipay nga nakakuha siya og titulo sa maong indigay sa kaanyag sanglit wala gyud matud pa siya magdahom nga mao kini ang iyang makab-ot gumikan sa higpit nga panagtigi.

“I’m performing for the Lord,” mao matud pa ni ang iyang gisilsil sa iyang hunahuna niadtong nagpadayon na ang pageant, ilabi na niadtong nagkagrabe na ang rehearsals.

Isip Ms. Phil-Water hingusgan matud pa ni Muriel ang pagdasig sa mga tawo nga dili na mugamit og plastic bags aron malikayan ang pagbaha ilabi na sa downtown karon nga ting-uwan na. Iyang gipaambitan nga sa usa ka munisipalidad didto sa Luzon, duna gyud matud pay adlaw nga gigahin aron ‘bayong” ang gamiton nga sudlan sa gipamalit.

Matud pa usab niya nga sa iyang pagpangompra, dili na gyud siya mugamit og plastic bags.

Samtang gipadayag ni Acosta nga may mga billboards matud pa ni Muriel ang mulugwa sa dili madugay isip Olive C endorser. Mulibot pud matud pa si Muriel sa nagkadaiyang pageants sa nasud isip guest.

Sa habig sa Carousel mapuno pud matud pa si Muriel og campus tours aron palapdan ang kampanya sa pagpanalipod sa kinaiyahan ug maglakip na kini sa pagpananom og mga kahoy.

Pagkakaron mihunong una si Muriel sa iyang pagpadayon sa iyang kurso nga nursing sa Velez College ug hayan sa second semester adto na siya sa Manila mupadayon og eskuyla.