CEBU, Philippines - Gipadayag ni Vice Ganda nga nanghinaut siya nga dunay maka-guest nga mga news personalities sa programa niya nga Gandang Gabi Vice . Kini sama nila ni Korina Sanchez ug Noli de Castro. Matud pa niya nga dakong hagit alang kaniya kung maka-interview og newscaster gumikan kay kinahanglan nga dretso-dretso ang iyang mga pangutana ug kinahanglan nga magkatawa gyud ang mga viewers sa topic.
Gerald kontento na sa Kapatid
Kontento na si Gerald Santos sa iyang istado karon sa TV 5 busa iyang giklaro nga dili pa siya andam mobalik sa kanhi niya mother network ,ang GMA-7. Kini maoy tubag sa singer sa mitumaw nga report nga posibleng kuhaon siya nga guest sa usa ka programa sa GMA.
Shalani nominado sa OMG
Nagmaya og maayo ang kampo ni Valenzuela City Councilor Shalani Soledad gumikan kay nominado kini alang sa kategoryang favorite TV host sa OMG Awards nga gipasiugdahan sa Yahoo Philippines. Suma pa sa konsehal nga wala siya magdahom sa maong nominasyon gumikan kay bag-o pa lang gyud siya sa showbiz industry.
Espesyal nga adlaw
Iselebrar ni Piolo Pascual ang Father’s day uban sa iyang anak ug espesyal gyud kini nga adlaw alang sa aktor gumikan kay tagaan gyud niya og dakong panahon ang iyang anak bisan pa man sa ka-busy sa iyang showbiz career. Gawas sa pag-arte, giatiman usab karon sa aktor ang iyang music career.
“Marry Me Mary”
Magsugod na karong Lunes, June 20 ang bag-ong Koreanovela sa ABS-CBN nga “Marry Me Mary”. Giingong bongga ang maong programa gumikan kay naghisgot kini sa usa ka babaye nga nag-problema gumikan kay duha ka lalaki ang gustong magpakasal kaniya. Ang “Marry Me Mary” gibidahan nila ni Moon Geun Young ug Jang Geun Suk.
Kever sa tsismis
Mitumaw nang tsika nga matud pa misamot na hinuon ka-close sila si Julia Montes ug Enchong Dee sukad gilambigit ang ilang mga pangalan . Giingong malipayon si Enchong kung kanunay niya nga makauban si Julia. Matud pa ni Enchong nga dili siya magpadala sa intriga gumikan kay dili kini makatabang sa iyang career. (Sanden J. Anadia)
Visayan Indie Films makita sa usa ka cable channel
Mapasigarbuhong gipahibalo sa BlueWave Marketing Corporation nga maoy nagdumala sa MVGC Sports and Entertainment Channel (MSEC) mopakita sa mga nagkadaiyang Visayan Indie Films sugod karong Hulyo sa ala-una sa kadlawon hangtud sa ala-una sa udto.
Gipahigayon sa miaging adlaw ang pinirmahay sa Memorandum of Agreement tali nila ni Blue Wave General Manager Alex Villamar ug sa giisip nga filmmaker sa Sugbo nga si Leonard Chiu.
Gipadayag ni Villamar nga ang maong proyekto naghatag og oportunidad nga masaksihan sa kadaghanan ang mga local indie films ilabi na nga ilang channel gipaluyohan sa kapin sa 100 ka cable operators nga nagtangag sa kapin sa 400,000 ka subscribers tibuok nasud.
Dugang pa ni Villamar oras na nga matagaan og luna sa telebisyon ang mga hinimo sa Sugbuanong filmmakers ug makapadasig usab kini sa publiko nga magpadayon sa ilang kawsa sa paggama og mga indie films.
Pipila sa mga Sugbuanong pelikula nga malantawan sunod bulan sa MVGC Sports and Entertainment Channel mao ang mga mugna ni Chiu sama sa Murio-Murio ug Nag-breakfast Ka Na Ba? nga nakadawat na og special award kaniadto sa San Francisco Film Festival.
Angelina miduaw sa Turkey
Miduaw si Angelina Jolie sa Turkey aron matabangan ang mga tawo nga mibakwit sa maong dapit gumikan sa gubot nga nahitabo didto sa Syria. Nagdala usab ang aktres og mga dulaan alang sa mga bata. Nasayran nga moabot ngadto sa 9,600 ang naggikan sa Syria ug namalhin karon sa Turkey. Matud pa nga 20 na ka nasud ang naduaw na ni Angelina sukad nagsugod siya sa iyang adbokasiya partikular na sa pagtabang sa iyang isigkatawo.
Maria nakapuntos na pud!
Nagbaha na usab karon ang mga pagdayeg gikan sa publiko ang gi-upload nga video sa Filipino-Canadian nga si Maria Aragon . Giawit ni Maria ang Price Tag ug kapin na sa dos milyones ang ni-view niini kagahapon. Kahinumduman nga misikat kaniadto si Maria gumikan gihapon sa Youtube sa dihang nadiskubrihan ni Lady Gaga ang version sa bata sa awit niya nga Born This Way.