CEBU, Philippines - Unsa katinuod nga may mga fans ni Jericho Rosales nga nalain o dismayado sa organizers sa ‘Hinulawan Festival” sa Toledo, City tungod kay giputol ang iyang performance ug wala na lang gani niya makanta ang theme song sa bag-o lang nahuman niya nga teleserye sa ABS-CBN, ang ‘Green Rose?”
Ang tsika mao nga nagsugod ang tanan dihang miabot si Gobernador Gwen Garcia sa venue pasado alas kwatro sa hapon, isip pinasidunggang bisita sa festival.
Suma pa sa tinubdan sa Banat News Hugyaw nga samtang nagkanta pa si Jericho kalit nga mitingog ang host aron pagtimbaya sa pag-abot sa gobernador ug sa mga misalmot sa Suroy Suroy Sugbo-Midwest. .
Okay ra matud pa ang mga nagtan-aw tungod kay normal ra man nga mutingog gyud ang usa ka host og kalit kun may pinasidunggang bisita nga muabot sa usa ka programa o kalihukan.
Ang sunod nga mga eksena maoy nalainan sa mga nakasaksi ug nakadungog.
“Murag naay nakasenyas niya (Jericho) nga last song na to niya. So misulti siya nga ganahan pa gyud unta siya mukanta sa theme song, pero dili na gyud mada, maong nangayo siya og dispensa,” nagkanayon ang tinubdan sa Banat News Hugyaw.
Pero diha matud pay misenyas niya nga ipadayon lang ang iyang pagpasabot ngadto sa publiko nganong dili na niya mahimong kantahon ang iyang last song, maong naglibog matud pa si Echo unsa gyuy angay niyang buhaton.
‘Dili sala ni Gov (Gwen) kay nakig-istorya pa gani siya ni Echo nga sa akong nasabtan basi lang sa buka sa ilang baba, iyang giingnan si Echo nga sige ipadayon lang,” nagkanayon ang tinubdan.
Dinhi nagpasalamat si Echo sa mga mitan-aw kay niya pa nindot kaayo sila nga crowd, dungan matud pa sa pagpadayag og panghinaot nga unta makabalik pa siya sa Toledo. Hangtud nga nagpasalamat siya sa mitan-aw sa Green Rose. Apan wala pa gani matud pa siya mahuman, gisapawan na siya sa host.
“Kalit og ingon ang host nga, “Thank you so much Jericho Rosales.” Kami nga nakakita kay nalain gyud mi kay hasta kapila kaha niya (host) gi-cut si Jericho sa iyang mga pasalamat. Lain gyud,” nagkanayon ang tinubdan.
Apan ang samang tinubdan miingon nga sa Twitter account ni Echo nagpasalamat ang nahisgutan sa mga taga Toledo, City gumikan sa pagdapit niya ug sa mainitong paghangop sa mga tumatan-aw.
Samtang ang vice mayor sa dakbayan, Hon. Arlene “Dydee” Zambo sa iyang Facebook account niadtong Lunes, nangayo og pasaylo ngadto sa mga nadismaya ug miklaro nga igo lang nilang gisunod ang unsay nasabutan.
“Read so many negative comments regarding the awkward situation we had with Jericho Rosales yesterday. Please be informed that they were supposed to be on stage at 4pm due to our tight schedule of the arrival of Gov. Gwen and the Suroy-Suroy group but, they were late. Out of PROTOCOL we had to acknowledge the arrival of the Governor. Gov even apologized to Echo for the interruption. I also personally called Metro Gaisano to apologize. So I hope this issue will be put to an end. Jericho Rosales is not HINULAWAN FESTIVAL. It's the people/children who have labored hard to come out with such grand productions. And it's all about our thanksgiving to our PATRON SAINT JOHN OF SAHAGUN,” nagkanayon siya sa FB. (BANAT NEWS)