Nanaksak kay Direk Ricky buntis ang dyowa!

PIK : Hindi napigilan na maiyak ni Snooky Serna nang magkita sila ni Mother Lily Monteverde sa special screening ng luma nilang pelikulang Summer Love na nabuo muli ng SOFIA o Society of Filipino Archivists for Film na ginanap sa Tanghalang Manuel Conde ng CCP kamakailan.

Thirty years na pala ang Summer Love kung saan isa si Snooky sa mga bida kasama sina Maricel Soriano, William Martinez, at Gabby Concepcion.

Magmula nun isa na siya sa pinakapaboritong Regal baby ni Mother Lily pero aminado itong na­ging pasaway siya at sakit ng ulo ng Regal matriarch.

Kaya nung nagkita sila uli nung Sabado, hiyang-hiya si Snooky at mahigpit itong yumakap at humingi ng sorry kay Mother Lily.

Mahigpit din ang pagkayakap ni Mother Lily kay Snooky at sinabi naman niyang mahal pa rin niya ito at nagpapasalamat siyang dumalo ito sa naturang screening.

Malaki ang pasasalamat ng Regal Films producer sa SOFIA dahil nagawa nilang i-preserve ang tatlong dekada nang pelikula nila kaya isa sila sa nakikiisa sa pagbigay suporta sa bagong grupong ito.

PAK : Totoo kayang seryoso na itong hidwaan nina Marian Rivera at Heart Evangelista, na nagsimula lang sa shooting ng Temptation Island?

Iniiwasan na ng GMA 7 na pag-usapan pa ito kaya nakikiusap silang huwag nang ungkatin pa o itanong pa sa dalawang bida dahil ayaw daw nila ng negative publicity para sa pelikula.

Malapit nang matapos ang shooting nito at gusto nilang iwasan na ang mga ganung intriga.

Si Heart naman ay kaagad na lilipad patungong Brazil pagkatapos ng shooting kaya hindi ko lang sure kung makakasama pa ito sa promo ng naturang pelikula.

BOOM : Kaugnay pa rin sa pagkasaksak sa actor/director na si Ricky Rive­ro, nakasama kami sa paghatid sa suspek na si Hanz Ivan Ruiz sa St. Luke’s para kumpirmahin ni Ricky kung itong si Ruiz nga ang may kagagawan ng krimeng iyun.

Mahigit isang oras sila sa loob ng hospital at doon nagkaroon ng imbestigasyon at galit na galit daw si Ricky na itinuro itong si Hanz ang sumaksak sa kanya ng labimpitong beses.

Kinumpirma ring mga gamit ni Ricky ang nakita sa black na back pack ni Ruiz kaya positibong siya nga ang may kagagawan.

Paglabas ng hospital, tahimik na itong suspek at hindi na sinasagot ang mga tanong namin.

Pagbalik sa presinto ng QCPD Station 10, sinalubong ito ng karelasyon niyang babae na isang buwang buntis na raw.

Pagpasok sa kanya sa selda, kinausap ito ng babaeng karelasyon niya at ilang kaibigan, doon na humagulgol nang iyak si Ruiz.

Ayon sa imbestigador, sa lalong madaling panahon, sasampahan na raw ito ng kaukulang kaso.

Nasa mabuting kalagayan na rin daw si Ricky at stable na itong nagpapagaling sa hospital.