Vice-Anne-Sarah movie

CEBU, Philippines - Duna matud pay giplano karon nga pelikula ang Viva Films diin hiusahon ang labing dagko nila nga bituon aron pagguba sa kasamtangang box-office record sa Pilipinas.

Ang mga dagkong bituon sa Viva walay lain kundili sila si Anne Curtis, Vice Ganda ug Sarah Geronimo.

Dunay working title nga "2 and 1/2 Sisters" (2 and a Half Sisters), gikatahong kung mahinayon ang maong plano, sugdan ang shooting niini sa hinapos nga bahin niining tuiga.

Kini tungod kay kasamtangan pa karon nga gihimo ni Vice ang iyang ikaduhang pelikula nga giulohan og "Private Benjamin", nga co-production sa Viva ug Star Cinema. Kauban ni Vice sila si Jimmy Santos, Eddie Garcia, Malou De Guzman, Paolo Hubalde, Dj Durano ug Kean Cipriano.

Samtang si Anne kasamtangan usab nga naghimo sa iyang labing unang album.

Pero kung mahinayon gyud ang maong pelikula, giplanohan matud pa sa Viva nga leading men nila ni Sarah sila si Gerald Anderson, Xian Lim ug Jericho Rosales.

Perteng dakoa’g kita

Ang pelikulang "Pirates of the Caribbean: On Stranger Tides" na maoy naggunit sa record nga labing dako og nationwide gross sa Pilipinas sulod lang sa tulo ka adlaw. Mitala kini og P62.37-million gikan sa Biyernes ngadto sa Domingo (May 20 to 22). Tungod niini, nalabwan ang natala sa "Thor nga " P59.5-M .

Si Ellen Adarna gyud diay

Ang Cebuana nga si Ellen Adarna ang naghupot sa record nga labing daghan og fans nga mitambong sa autograph signing alang sa FHM magazine cover. Nahitabo kini niadtong December 2010. Gisundan siya nila Cristine Reyes, Katrina Halili ug Diana Zubiri. Kasamtangan nga naa sa ikawalo nga pwesto si Ellen sa FHM Sexiest 2011 poll.

Andam na sa "Glee"

Kung makadawat og pormal nga imbitasyon, andam na si Representative Manny Pacquiao nga mulugwa sa US hit musical nga “Glee.” Kahinumduman nga gipangutana si Pacman sa milabay nga semana kun andam ba siya nga mulugwa sa maong show, apan tubag niya: "I'm busy." Pero sa interview sa 24 Oras niadtong Martes sa gabii, positibo na ang tubag sa boxing champ, basta duna lay klaro nga imbitasyon.

Tinuyo ang intriga sa "Amaya" stars?

Daghan ang nagtuo nga tinuyo ang mga isyu nga naglambigit sa mga bida sa epicserye sa GMA-7 nga "Amaya," aron mahisgutan og maayo ang maong project nunot sa pagsugod na niini karong Lunes, May 30 sa primetime. Unang giintriga mao si Sid Lucero, nga gipasanginlan nga nangulata og tindero sa usa ka hardware, apan hangtud karon wala pay kaso nga na-file. Misunod si Marian Rivera nga gi-isyu og maayo ang pagdapog niini kang Manny Pacquiao sa Party Pilipinas. Ug niadtong Martes, migawas na ang usa ka buwan na nga intriga nga nude scandal matud pa ni Mikael Daez.

Grabeng gugmaha uy!

Gipadayag ni Mickey Ablan nga buwag na gyud matud pa sila ni Iwa Moto apan perti pa niyang gugmaha niini. Apan kung makauyab matud pa og lain gang sexy star, makadwat ra siya niini, basta magmalipayon lang ang dalaga. Pero kun makigbalik matud pa niya si Iwa, pakaslan ni niya dayon. Upat ka tuig na silang magkarelasyon. (BANAT NEWS)