Milugwa ang tiunay nga mga lig-on!

CEBU, Philippines -  May mga napawong ang bidlisiw, ug may mga misidlak og maayo aron magmadaugon. Ingon niini paghulagway ang mga eksena sa malampusong Mr. & Ms. Eco-Tourism Philippines-The Bikini Summit 2011 Cebu Leg, nga gipahigayon diha sa entablado sa Teatro Casino sa Waterfront Hotel-Lahug niadtong Huwebes sa gabii. Kini kun itandi ang performance sa 10 ka mga lalaki ug siyam ka mga babaye nga nag-ilog sa titulo sa maong gabii, ngadto sa ilang unang paglugwa sa screening.

 May mga gipaabot nga musidlak, apan kalit nga napawong samtang diha na sa entablado. Napawong, gumikan sa kakuwang sa enerhiya nga gipakita aron sila maoy mauyonan sa mga hurado alang sa titulo. Duna puy mga kandidato nga dili maayo ang make-up, diin mas babaye pa og nawong kaysa mga kandidata gumikan sa kabaga ra sa blush on.

Usa sa dako kaayo ang positibo nga kausaban mao ang 18-anyos nga Filipina-German nga si Mira Mae Dimmerling nga tinun-an sa University of San Carlos kinsa maoy nakoronahan isip Ms. Eco-Tourism. Sa screening, tulo ka semana ang milabay, lutaw na kaayo ang kaanyag ni Dimmerling apan may mga nabalaka sanglit mauwawon ug daw dili kasaligan ang tinubagan, apan labihan ka hugyaw sa performance sa coronation night.

Mitatak ang tubag ni Dimmerling sa pangutana unsay isugyot niya sa Ginoo kabahin sa nahimutangan sa Pilipinas kun ugaling magkaatubang sila. Niya pa, “I’ll suggest nothing because every one of us knows God is perfect and he knows everything.”

Samtang nahimong komedya human sa pageant ang matud pa wala nay makapildi pa kang Mr. Eco-Tourism Judda Jyrey Cohen sanglit gikan sa labing una niyang pageant sa USC duha ka tuig na ang milabay hangtud na sa ikaupat niyang indigay niadtong Huwebes sa gabii, wa pa gayud siya mapildi bisan kausa.

Lisud tupngan ang pamaba matag Q & A, kinahanglan na lang nga maundan og gamay si Judda aron sigurado na gyud nga walay makapildi niya.

Gawas sa duha ka titulo nga nadaog niya sa USC, si Judda ang kasamtangang Mr. Cebu Tropical Hunk. Sa casual interview, gipaambitan niya nga daghan kaayong midapit niya aron magpa-screen sa nagkadaiyang pageant karong tingbakasyon apan iyang gibalibaran. Apan pagkasayud niya kabahin sa eco-tourism pageant mihukom siya nga musalmot gumikan kay kumbinsido siya sa kawsa pagpanalipod sa kalikupan.

Sa pikas bahin,  sa mga lalaki, 1st Runner-up si Dennis Paolo Portugaleza ug 2nd Runner-up si David Horst Sommerauer, kinsa maoy midaog sa Cebu Runways Best sa milabay nga tuig. Sa mga babaye 1st Runner-up si April Jane Panugaling, kinsa bag-ohay lang nalakip sa Miss Bikini Philippines Top 10 sa Manila; ug 2nd Runner-up si Astrid Hernandez.

Mihakot og special awards si 2009 Mr. Cebu Kris Nimrod Cabigas sama sa Best in Production Number, Male Rebel Award ug People’s Choice Award. Most Photogenic ug Mr. Cebu Ferries si Mr. Lapu-Lapu 2011 Jomar Bilacura; Best in Swimwear si David ug nalangkat pud niya ang Best in Resort Wear. Si Judda maoy Mr. Supercat ug si Marc De Asis ang Mr. Superferry.

Sa mga babaye, mihakot og minor and special awards si April sama sa Ms. Cebu Ferries, Ms. Olive C, Miss Rebel Award, Miss Photogenic, ug Best in Swimwear. Pero wala pud magpauwahi si Mira Mae sanglit siya maoy Miss Glutamin Body ug Best in Casual Wear. Si Amelie Grauel maoy Miss Superferry, Best in Production Number ug People’s Choice, samtang si Astrid maoy Best in Resort Wear ug Miss Supercat. Si Paula Love Binasor maoy Miss New Placenta.

Ang Mr. & Ms. EcoTourism Philippines The Mossimo Bikini Summit 2011 Cebu Leg mugna sa Tour de Franz, Galaxy Productions, ug Mossimo. Si Rommel Pareja maoy host. Sila si Mira Mae ug Juddah maoy pambato sa Sugbo alang sa nasudnong indigay karong June 18, sa Nasugbu, Batangas.