CEBU, Philippines - Wa magdahum ang nagpasiugda sa Kadaugan Street Party sa dakbayan sa Lapulapu nga gihangop pag-ayo sa tumatan-aw ang aktibidad.
Sa unang gabii Abril 29 sa duha ka adlaw nga street party ang dalan gikan sa first bridge ngadto sa second bridge gidagsa sa 20,000 ka mga tawo matud sa pagbanabana sa kapulisan.
Sa pagka Abril 30, sa gipahigayon nga Rampada street dancing, ang katawhan mikabat sa 40,000, suma pa sa hepe sa kapulisan sa dakbayan P/SSupt.Anthony Obenza.
“Nagtuo ko nga mokabat lang og 10,000 ka tawo ang motambong tungod kay pirmero pa man ni nga victory party nga gipasiugdahan sa syudad aron sa pag-celebrate sa kadaugan ni Datu Lapulapu batok ni Ferdinand Magellan. Wa ko magdahum nga ingon ato ka daghan ang mga tawo,” nagkanayon si Konsehal Harry Don Radaza kinsa nangulo sa pag-pasiugda sa Kadaugan Street Party.
Midaug sa Rampada ang Viva Imperial nga gipaluyuhan sa Imperial Palace Waterpark Resort and Spa ug midawat og P50,000. Ang second prize nga P30,000 nadaug sa Barangay Gun-ob samtang ang third prize nga P20,000 nadaug sa Barangay Buaya.
Sa lain nga premyo nga alang sa mga entrante gikan sa barangay, ang first prize nga P30,000 nadaug sa Barangay Gun-ob samtang ang P20,000 nga second prize nadaug sa Barangay Buaya. Ang third prize nga P10,000 alang sa barangay nadaug sa Barangay Looc.
Ang napilian nga Reyna Bulakna mao ang representante sa Viva Imperial. Ang best headress nakuha usab sa Viva Imperial. Ang Best in Costume nakuha sa Barangay Gun-ob samtang ang Most Lively category nakuha sa Barangay Buaya. Sila nakadawat sa premyo nga P5,000 matag usa.
Ang Kadaugan Street Party mitanyag sa mga free concert ug mga disco nga gipaluyuhan sa Faces Bar, dyLS f.m. sa ABS-CBN, dyRT f.m. sa GMA, Let’s Share TV.com samtang gihimo sa Goldberry Suites and Hotel ang atubangan sa ilang hotel nga usa ka streetbar pinaagi sa pasundayag sa DJ sa Loft.
Ang car show nga gipaluyuhan sa Federation of Auto Clubs of Cebu mi-display sa 200 ka mga sakyanan atubangan sa City Hall building. Ang mga hotels ug resorts sa dakbayan mitapos sa ilang usa ka semana nga food festival gikan sa Liberty Shrine ngadto sa gourmet walk sa Kadaugan Street Party.