Solenn hindi nakatiis sa pang-aapi ng asawa't biyenan
MANILA, Philippines - Nagbabalik ang Queen of Asianovela na si Kim Jung Eun, hindi lang para magpakilig, kung hindi para makipagrakrakan gabi-gabi sa primetime sa pagsisimula ng pinakabagong Koreanovelang handog ng ABS-CBN - ang I am Legend.
Minahal siya bilang Vivian sa Lovers in Paris, Lulu sa Princess Lulu, at Jackie sa Lovers, at ngayon muli ninyong mamahalin ang tinaguriang alamat na ng larangan ng Asianovelas bilang si Solenn, isang simpleng housewife na matapos iiwan ang asawa ay tinuloy ang pangarap na maging isang rockstar.
Simula ng ikasal siya sa ubod ng yamang abogadong si Jerrod Cha (Kim Seung Soo), kontrolado na ang buong buhay niya ng kanyang asawa at maging ng kanyang biyenan. Tiniis niyang lahat hanggang sa isang araw ay pumiglas na si Solenn nang pinagbawalan siya ng mga ito na suportahan ang may sakit niyang kapatid.
Ngayong malaya na siya uli, babalikan ni Solenn ang kanyang tunay na mahal— ang musika.
Kasama ang kanyang mga kaibigan, bumuo sila ng banda at sabay-sabay nilang tatahakin ang daan patungong kasikatan.
Sa pagpasok din ng band manager na si Tristan (Lee Joon Hyuk) sa buhay ni Solenn, tatahakin din kaya niya ang daan patungo sa bagong pag-ibig?
Ano ang gagawin ni Solenn kapag nakipagbalikan sa kanya ang dating asawa na si Jerrod?
Huwag palalampasin ang pagbabalik ni Kim Jeung Eun sa I am Legend, ngayong Lunes na (May 2) pagkatapos ng Green Rose sa Primetime Bida ng ABS-CBN.
- Latest
