CEBU, Philippines - Naghinam-hinam na ang pambato sa dakbayan sa Sugbo nga si Muriel Adrienne Isidore Orais sa umaabot nga dakong inidigay sa kaanyag , ang Ms. Earth-Philippines 2011 nga ipahigayon karong Hunyo didto sa Palawan.
Tsika pa ni Muriel dinhi sa Banat Hugyaw nga nakita gyud niya nga lig-on ang ubang mga kandidata. Apan giklaro niya nga dili siya magpadala sa iyang kulba aron matarong niya ang iyang performance sa nagkadaiya nila nga kalihukan.
“Ako ipakita nila nga makaya nako, importante man gud kaayo nga dili ka kulbaan kung moatubang ka sa daghang tawo,” suma pa ni Muriel sa eksklusibo nga interview niini sa Banat Hugyaw kagahapon.
Usa sa mga preparasyon niya karon ang paggahin og saktong oras sa pag-ehersisyo, saktong pagkatulog ug saktong gidaghanon sa pagkaon.
“Kung buntag gani, mokaon gyud ko og daghan aron dili ko maluya tibuok adlaw,” dugang pa niya.
Dakong hagit alang kaniya ang pagsalmot sa Ms. Earth-Philippines 2011 gumikan kay lukdo niya ang kadungganan sa Sugbo dungan usab sa pag-abag sa Psalmstre Enterprises, tiggama sa New Placenta, Glutamin ug Olive C.
Nadasig ang Psalmstre Enterprises pagsuporta kang Muriel human usab siya midaog sa nationwide search sa Mr. & Miss Olive C Campus Model sa milabay nga tuig.
Tsika pa niya nga buhaton niya ang tanan aron makuha niya ang crown ilabi na nga nailado na ang Sugbuanon nga lig-on gyud sa natad sa mga indigay sa kaanyag.
“Nanawagan ko sa mga taga-Cebu nga motabang sila sa pag-ampo nga matarong nako ang akong performance. Akong buhaton ang tanan aron ma-proud sila nako.Salamat kaayo sa tanang suporta nga inyong gihatag nako,” panapos pa ni Muriel.
Hinuon, tsika nga nasagap sa Banat News Hugyaw mao nga usa si Muriel sa early favorites sa maong pageant diin usa siya sa gikagubtan sa mga tigbalita atol sa press presentation niadtong milabay nga Martes didto sa Manila.
Nahanas na si Muriel sa pagrampa sa entablado sanglit usa usab siya ka fashion model dinhi sa Sugbo ubos sa Ozar Models ni Danny Booc ug nakasalmot na usab siya og nagkadaiyang mga beauty pageants, diin labing una niini isip Ms. Velez diin tinun-an siya sa kurso nga nursing. (BANAT NEWS)