PIK: Nasa Malaysia kami nang mabalitaan naming nasaksak si Pilar Pilapil at itinapon sa Antipolo pagkatapos ay tinangay ang kotseng gamit niya tangay din ang kanyang kasama.
Nataranta si Manay Lolit sa naturang balita at pinagsabihan ang mga alaga nito na mag-ingat sa mga shooting at taping nila dahil sa nakakatakot na raw ang mga ganung carnapper na willing nang pumatay ng tao makuha lang ang kotse mo.
Bilib din siya kay Pilar na nalagpasan pa niya ito pagkatapos siyang pagsasaksakin.
PAK: Kahapon ang first shooting day ng Temptation Island sa Ilocos. Last minute ay tinanggal si Paulo Avelino dahil sa nagka-pneumonia at ilang linggo itong pinagpahinga ng doktor. Si Mikael Daez ang ipinalit at mabuti at libre raw ang schedule nito.
BOOM : Tuwang-tuwa si Tonton Gutierrez na ibinalitang magda-dalawang buwang buntis na si Glydel Mercado.
Halos limang taon na rin ang panganay nilang si Aneeza at matagal na rin nilang gustong masundan ito.
Magsisimula na si Glydel sa Binondo Girl at puwede pa naman daw siyang mag-taping pero pinag-iingat lang ito.
Samantala, isinugod naman si Amy Austria sa hospital pagkatapos niyang makaramdam ng matinding sakit ng tiyan habang nagti-taping sa Minsan Lang Kita Iibigin nung nakaraang Huwebes.
Hindi na inilabas ng hospital si Amy dahil kailangang operahan daw para tanggalin ang bukol sa uterus nito.
Okay na ngayon ang kalagayan ni Amy at kasalukuyang nagpapagaling na ito ngayon, pero ilang linggo rin itong pinagpahinga ng doktor.