Kyla at BF kasal na!
PIK : Kumalat ang tsikang nagpakasal na ang magkasintahang Rich Alvarez at Kyla.
May nakakita kasi sa kanila sa tanggapan ni Mayor Jun Jun Binay ng Makati at doon nagsimula ang tsismis na nagpakasal sila.
Tinanong namin ang manager ni Kyla na si Arnold Vegafria, wala siyang kaalam-alam na may ganung pangyayari. Ang alam niya, abala si Kyla sa mga singing engagements kaya wala siyang kamalay-malay na nagkaroon na ng civil wedding.
Basta ang alam niya, abala ngayon ang magkasintahan sa paghahanda sa kanilang church wedding na gagawin sa December ngayong taon.
Kung sabagay, puwede naman silang magpa-civil wedding muna bago ang kasal sa simbahan dahil matagal na rin namang hinihintay sa kanila ang kasalan.
Wala pang sagot ang magkasintahan sa isyu.
PAK : Naintriga ang mga taga-Tweetbiz Insiders nang dumalaw minsan si Rufa Mae Quinto sa taping nito. Si Fabio Ide ang pinuntahan niya at hinintay hanggang sa natapos ang taping.
Paliwanag ni Fabio, nagkausap lang sila ni Rufa Mae doon dahil tinuturuan siya ng mga gagawin sa taping nila sa Dwarfina dahil sila ang madalas na magkaeksena.
Huwag nang lagyan ng malisya dahil talagang magkaibigan lang daw sila. Pagkatapos ng eksenang ‘yun na nasaksihan ng mga taga-Tweetbiz Insiders, bumalik na si Rufa Mae sa kabilang studio na kung saan nagti-taping ang Bubble Gang.
Ilang sandali lang, may dumating naman na isang lalaki at siya naman ang dinalaw. Isang kilalang photographer ang lalaking ito.
BOOM : Si Aljur Abrenica ang duda ng karamihan na tinutukoy na bagong inspirasyon ngayon ni AiAi delas Alas.
Nagkabukingan sa guesting nito sa The Buzz nung nakaraang Linggo na kung saan, inurirat nang husto nina Kuya Boy Abunda at Charlene Gonzales itong lalaking inspirasyon niya na balak pa nitong bilhan ng kotseng Porsche.
Ang clue na naglabasan, taga-kabilang network ito dahil sabi ni AiAi wala namang may nagkakagusto sa kanya sa ABS-CBN.
Ang initial ng first name nitong aktor ay nasa first alphabet at edad 20 hanggang 25.
Sabi pa ni AiAi, kung deserve niya at ng mga anak niya ang magkaroon ng bagong Porsche, tingin niya deserving din ang lalaking ito na bibigyan niya ng naturang kotse.
Lately ay nagkita sina AiAi at Aljur nang mag-show ang komedyante sa Zirkoh Morato.
Nagkakilala sila sa phone nang tinawagan si AiAi ng bestfriend niyang pari na si Fr. Eric Santos na siyang nag-officiate sa thanksgiving mass ng Machete.
- Latest
