Regine papahuwayon hulipan ni iza

CEBU, Philippines - Daghan ang nag-atang unsaon pagdiskarte sa mga writers sa I Heart You Pare sa GMA-7 ang istorya niining maong romance-comedy series human gitino sa management kagabii nga pulihan na ni Iza Calzado ang bida nga si Regine Velasquez-Alcasid.

Suma pa nga kinahanglan nga mupahuway og tarong si Regine tungod sa grabe na niini nga migraine, sigon usab sa tambag sa iyang doctor.

Walay hisgot ang kampo ni Regine kun ang maong migraine ug ang pagpahuway niini og tarong konektado ba sa balita nga lima ka semana na nga nagsabak ang Asia's Songbird.

Hangtud karon wala pay reaksyon ang magtiayong Ogie ug Regine kabahin sa tsika nga mabdos ang nauwahi.

 Ang sigurado mao nga sugod karong Lunes, si Iza na maoy mudala sa papel nga Tonette sa I Heart You Pare.

Tungod niini, dunay mga nanawagan kagabii pa lang nga tarungon gyud sa mga writers ang pagpasabot nganong ang nawong ni Regine, nahimo na nga nawong ni Iza isip Tonette.

Suma pa sa mga fans sa maong serye, angay nga likayan ang twist nga madisgrasya si Tonette ug mupailawom kini og plastic surgery sanglit dili na gyud kini katuohan tungod kay kanunay na lang nga mao ni gigamit nga pamaagi sa mga serye nga ingon niini ang sitwasyon.

Si Dingdong Dantes maoy leading man ni Regine sa I Heart You Pare, diin niining bag-o lang nadugang pud si Mark Anthony Fernandez.