CEBU, Philippines - “Mag-TV Na” karong Abril! Kini kay masaksihan ang hugyaw gyud nga mga episodes nunot sa pagsaulog nila sa ikatulo nga anibersaryo sa naandan na ug gihangop pag-ayo nga Sunday program sa ABS-CBN –Cebu.
Tsika pa sa executive producer sa maong show nga si Bonding Adrian Diongzon ispesyal gayud nga mga episodes ang giandam nila alang sa mga Sugbuanon.
Gitawag nila kini Mag TV “T3rrific” ug bongga nga surpresa ang masaksihan ug mapaabot sa mga tumatan-aw.
Karong Abril 3 ug 10, tuyokon sa inyong mga Ka-Mags nga sila si Borgie Cabigas , Blinky de Leon, Phoebe Kaye Fernandez ang Boracay.
Masuta ang rason kung nganong kanunay nga dumugan sa mga tawo ang Boracay, maila-ila usab ang mga nag-unang negosyo sa maong dapit.
Mopaambit usab sa ilang sugilanon ang mga tawo nga milambo gumikan sa nagkadaiya nila nga negosyo sa Boracay.
Ug karong Abril 17, masaksihan diha sa tulumanon ang mga kapamilyang Sugbuanon nga makadawat og libreng home make over .
Nagkanayon si Adrian nga gusto nila nga magmalipayon ang mga viewers kinsa giisip nila nga parte sa nakab-ot nga kalampusan sa maong show.
Angayan usab atangan ang episode nila karong Abril 24 nga naatol usab sa Easter Sunday sanglit ilang idalit kung unsay mga bag-o karong panahona.
Pipila sa ilang special guests mao ang mga bida sa bag-ong serye sa ABS-CBN nga “Maria del Barrio” nga sila si Erich Gonzales ug Enchong Dee.
“Daghan pa kay mi og sopresa alang sa atong mga Kapamilya, sigurado nga ma-enjoy sila pag-ayo,” suma pa ni Adrian.
Ang nindot nila nga mga putahe matag Domingo maoy hinungdan nga pabilin nga kusog sa masa ang Mag TV.
“Bisan pa man kapila mi nag-ilis og mga hosts, kusog gihapon ang Mag TV , kay importante man gud ang content sa show,” paambit pa ni Adrian.
Samtang ang host nga si Borgie nagpasalamat ngadto sa mga viewers gumikan kay gihangop gyud ang iyang personalidad sa masa.
“Grabe kaayo ka-challenge para nako ang pag-apil nako sa mag-TV , kay bisan kapoy , ang importante nga na-enjoy ko unya nalipay pud ang mga viewers sa among episode,” nagkanayon si Borgie.
Angel mosidlak sa Indonesia
Kasamtangan pa nga gitun-an ni Angel Locsin ang movie offer nga iyang nadawat didto sa Indonesia. Nadawat na sa aktres ang scipt niini ug wala pa siya kahukom gumikan kay basin dili niya kini madala tungod sa ka-busy sa iyang mga schedule.Nasayran nga usa ka Pinoy nga nagbase sa Indonesia ang nagplanong mo-produce og pelikula alang sa aktres. Gitambagan si Angel sa iyang mga higala nga mas maayo nga dawaton ang maong tanyag gumikan kay seguradong mosamot gyud kasikat ang aktres ug mahisama kini kang Christian Bautista nga sikat sa maong nasud.
Wala nagkasinabtanay
Wala gihapon mahunong ang isyu nga matud pa nga wala mahimuot sila si Bianca King, Lovi Poe, Solenn Heussaff, ug Michelle Madrigal kalabot sa report nga matud pa nga gipabalhin sila og laing area sa dihang wala nila matuyo nga nakasulod sa VIP Room sa Mactan Cebu International Airport sa milabay nga semana.Giingong gipabalhin sa laing area ang maong mga artista gumikan kay exclusive ra gyud kini sa ASAP Rocks sa ABS-CBN. Depensa pa sa MCIA nga igo ra nilanga gi-aksyonan ang reklamo sa usa ka staff sa Dos nga matud pa napuno na ang VIP room busa dili kini angayan sudlan og lain pa nga mga artista.
Sarah nagpakipot
Nagpadayon gihapon ang pagpangulitawo sa anak ni Camarines Sur Governor Ray Villafuerte nga si Miguel ngadto kang Sarah Geronimo.Suma pa nga kanunay karon ang pagpadala og buwak ni Miguel ngadto sa pop princess apan wala pa kini mohatag og signal kung unsa ang iyang response niini.
EB ug Mara Clara nanghawod
Padayon nga nag-una ang Eat Bulaga sa daytime slot diin nakakuha kini og 20.3% nga gibasihan sa Kantar Media-TNS National Household Ratings niadtong March 31. Samtang ang Mara Clara sa ABS-CBN maoy nakaangkon sa unang puwesto sa primetime slot nga nagtangag og 33.5%.
Orihinal nga bida banhawon
Nagplano ang Regal Entertainment, Inc. nga tagaan og espesyal nga partisipasyon ang mga beteranang aktres nga sila si Deborah Sun ug Azenith Briones sa remake sa Temptation Island. Nalakip kaniadto sila si Deborah ug Azenith sa original version sa maong pelikula. Mga bida sa remake niini naglangkob nila ni Solenn Heussaff, Marian Rivera, Heart Evangelista ug Lovi Poe.
KC wala pa’y plano
Birthday ni KC Concepcion karong April 7 apan wala pa siya’y ideya kung magpa-party ba siya o dili gumikan sa ka-busy sa iyang showbiz career.Giatngan usab sa publiko ang regalo nga ihatag sa iyang boyfriend nga si Piolo Pascual ngadto kaniya.
ASAP Revolution
“Unstoppable revolution” ang format sa programang ASAP ROCKS karong adlawa ug special guest ang Queen of all Media nga Kris Aquino. I-promote sa TV host ang bag-o niya nga album nga My Hearts Journey ug iyang makauban sa usa ka song number ang pipila ka mga hugyaw nga ASAP stars.
Nag-atbang
Kontrabida si Sandy Andolong sa pantaserye nga Mutya sa ABS-CBN samtang ang iyang bana nga si Christopher de Leon mao usab ang kontrabida sa Captain Barbell sa GMA-7.Pareho ang timeslot sa nahisgutan nga mga programa.
Willing Willie nawad-an og sponsor
Temporaryong gihunong sa Mang Inasal ang ilang pagpa-advertise sa programang Willing Willie sa TV 5 gumikan sa kontrobersyal nga nasugatan sa maong show kung diin mihimo og sexy dance ang batang lalaki.
Pasalig ni Aljur
Gipasalig ni Aljur Abrenica ngadto sa amahan ni Kylie nga si Robin Padilla nga tinarong ang iyang intensyon ngadto sa dalaga.Una na nga gipadayag ni Robin kaniadto nga dili siya mobabag kung mangulitawo si Aljur kang Kylie apan permi siya nga mipasidaan sa iyang anak nga dili magdali alang sa maong butang.