Michelle nasasaktan pa rin kay Jon

Hindi napigilan ni Michelle Madrigal ang maging emosyonal nang mag-guest sila kahapon ni Jon Hall sa Startalk para i-promote ang Captain Barbell.

Napaiyak si Michelle dahil masakit pa rin sa kanya na mapag-usapan ang break up nila ni Jon.

Inamin ng aktres na nahihirapan siya dahil magkasama sila ng dating dyowa sa Captain Barbell. Hindi nga naman madali na katrabaho mo ang ex-boyfriend eh fresh pa ang sugat ng kanilang break up.

Ang say naman ni Jon, mahal pa rin niya si Michelle pero napapadalas ang kanilang pag-aaway kaya mas makabubuti na maghiwalay na lamang sila para mapanatili ang friendship nila.

*   *   *

Inamin din ni Ervic Vijandre na hindi na sila close ni Aifah Medina, ang Sexbomb dancer na natsitsismis na girlfriend niya.

Nabuking ang relasyon ng dalawa nang makunan sila ng litrato habang magkasama na nagbabakasyon sa Hong Kong.

Hindi umamin si Ervic na naging dyowa niya ang ex-girlfriend ni JC De Vera pero exclusively dating sila. Pinaganda pa ni Ervic ang term pero obvious na may relasyon sila ni Aifah.

*   *   *

Magkasabay na nag-promote ng Captain Barbell sa Startalk sina Ervic at Isabel Oli na nali-link kay James Yap.

Pinanindigan ni Isabel na magkaibigan lamang sila ng soon-to-be ex-husband ni Kris Aquino pero mas marami ang naniniwala sa pasabog ni Baby James aka Bimby na siya ang bagong girlfriend ng fadir ng bagets.

Tinukso ko si Ervic na si Isabel na lang ang ligawan niya, ngayong loveless siya at kung totoo na hindi boyfriend ni Isabel si James. Basketball player din naman si Ervic ‘no!

*   *   *

Nahulaan ko ang subject ng blind item sa The Who segment ng Startalk tungkol sa aktor na dirty looking.

Noon ko pa napapansin na hindi na masyadong nag-aayos ang aktor na guwapo pa naman at mahusay umarte.

Nagmukhang masyonda tuloy ang aktor na parang laging bagong bangon mula sa kama sa tuwing nakikita siya sa mga showbiz events na kanyang pinupuntahan.

Dapat ibalik ng aktor ang kanyang clean cut na hitsura. Huwag niyang balewalain ang magandang mukha na ibinigay sa kanya ni Lord. Marami ang humahanga sa kanyang maamong face huh!

*   *   *

 Ang pagdating kahapon ni Sen. Panfilo Lacson ang breaking news ng GMA Newsflash habang umeere ang Startalk.

Lumapag sa Cebu City ang eroplano mula sa Hong Kong na sinakyan ni Sen. Lacson. Naalaala ko bigla ang kuwento ng isang Pinoy na na-sight niya noon sa Hong Kong ang senador na isang taon din na nagtago at pinaghahanap ng batas.

So, confirmed na true ang report ng Pinoy na nakakuwentuhan ko tungkol sa kontrobersiyal na senador na biglang lumitaw kahapon sa Cebu.