CEBU, Philippines - Yess, mga yadzz! May pagka showbiz kining akong hisgotan karon, pero daw dili pod showbiz. Kay this is about Ella Joy Pique, nga gikidnap diha sa Calajo-an, sa Minglanilla.
Kun buot god hunahuna-on, wa gyo’y kalambigitan ang pagdagit ni Ella Joy Pique sa showbiz, ug ako mismo, wa gyo’y labot sa iyang kamatayon, hangtod na gyod ngadto sa paghatod niya sa katapusan niyang pagpahuway diha sa sam-ang katoliko sa Pardo niadtong miaging Domingo, Pebrero 20. Pero nganong miadto man gyod ko? Nganong didto man gyod ko, sukad pa sa pagdala sa patay’ng lawas sa bata, gikan sa ilang pinuy-anan, hangtod na ngadto sa simbahan sa Pardo, ug ngadto na gyod sa menteryo?
PASSION. EMOTION. Tungod tingali sa akong passion sa pagsuta kun ngano gyod nga kining inosente kaayong bata, hilabtan man sa usa, duha o pipila ka mga tawo nga way puangod nga may pagka demonyo’g balatian ug kalag. Mao kini giingon nga, “truth is stranger than fiction..” Usahay, kun magsuwat ko’g usa ka sugilanon para sa telebisyon, O sa radio, mangutana pa ko sa akong kaugalingon kun posible ba kining hitaboa, nga mahitabo sa tinuod nga kinabuhi. Gani, pahimangnoan mi ni Bro. Nonito “Tatay Dodong” Lim Chua nga, dili mi magpataka’g suwat og sugilanon nga adunay gitawag og sensitibong topic. Mao man gani kini hinungdan nga usahay, dili na ko ganahang mosuwat, kay usahay pod god, ang akong imagination, molahos ngadto sa daw dili na katuohan. Pero unsa man kining nahitabo sa bata nga si Ella Joy Pique? Katuohan ba god unta kini, kun wa pa’y demonyo nga nagpaluyo sa mga tawo nga nagbuhat niini? Duna na’y pipila ka writers nga nakahunahuna sa paghimo’g usa ka sugilanon kalabot sa maong hitabo. Apan, nagtuo man god sila nga, moabot sila sa punto nga, ang naghimo sa maong krimen, nasudlan sa daotang espirito. Busa, unsaon man sa pagprisintar niini? Kun dili kini ikasalida sa INTV-CCTN, Channel 47, asa kini isalida? Mahimo na lang kining usa ka Indie Film. Pero kun dili sila si Berger ug Esdrelon ang mga kriminal, kay sa ilang panagway, daw wa man sila masudli’g daotang espirito, kinsa man gyod diay? Kinsa man ang nasudlan og daotang espirito, nga naghimo niini? Nakalayas na, o ania pa sa Sugbo?