Temptation of Wife fever natintal ka na ba?

CEBU, Philippines - Tentasyon. Panimalos. Gugma. Dinhi niining tanan nagtuyok ang istorya sa gikagubtan ug gikabuangan karon nga teleserye sa telebisyon, ang Temptation of Wife nga masud-ong diha sa GMA-7 matag buntag.

Sa merkado man o opisina, panimalay ug kadalanan—bisan asa gihisgutan ug gituki gayud sa kadaghanan ang matag eksena sa maong sikat kaayo nga Koreanovela nga maoy nakapainteres og maayo karon sa nasud nga Pilipinhon.

Gani dul-an usa na ka buwan nga ang maong serye ang kanunay nga nag-una sa bisan unsa nga survey, nasudnon man o Mega Manila.

Matag buntag, mahinamon nga giatangan sa publiko  ang mga lakang ni Angeline Goo (Jang Seo Hee) diha sa iyang pagpanimalos batok niadtong mga midaug-daug kaniya. Kini  naglakip sa kanhi niya bana nga si Marcel Jung (Byun Woo Min)  ug ang kabit  niini nga si Heide Shin (Kim Seo Hyung).  

Bisan pa man sa kadaghang mihilak sa  pait nga kasinatian ni Angeline, daghan usab ang mipahiyom ang mga kasingkasing dihang miabot sa iyang kinabuhi si  Nigel (Lee Jae-Hwang).

Bisan ang Sugbuanon nga Starstruck princess Diva Montelaba  walay sipyat sa matag anib sa maong serye.

“Nindot ug dili common ang story  maong kada adlaw gyud ko motan-aw og Temptation of Wife,” angkon pa ni Diva dihang nahinabi sa Banat News Hugyaw kagahapon.

Dugang pa ni Diva nga kung magsugod na ang maong serye, magtapok gyud sila sa pagpanan-aw niini sa iyang apohan, inahan ug mga  iyaan, ingon man usab ang iyang katabang.

Dunay panahon nga  mapungot siya, ilabi sa mga eksena daug-daugon ang bida nga si Angeline.

“Maglagot gyud ko ni Heide kay permi niya kontrahan si Angeline,” nagkanayon si Diva.

Suma pa niya nga duna gyu’y makuha nga leksyon  sa Temptation of Wife ug mao kini ang hinungdan nganong kanunay kini nga ma-number one sa survey.

 “Kung duna gani kay gibuhat nga dautan, mabalik ra gyud nimo. Sa gibuhat ni Heide, di ba gibawsan gyud siya ni Angeline,’ ni Diva pa.

Giangkon ni Diva nga dili siya ganahan kaniadto og Koreanovela  apan gumikan sa Temptation of Wife, makadayeg na gyud siya sa mga Korean series.

Gawas nga istorya kini sa pakigbisog, ganahan gyud ang tumatan-aw gumikan sa anggulo sa gugma.

“Makilig gyud ko sa  gibuhat ni Nigel sa wala pa siya sugta ni Angeline.Kasagaran sa mga taw kay  maka-relate gyud , kay gipakita man gud sa series nga kinahanglan nga taas og pasensiya ang guy kung manguyab siya sa girl,” matud pa ni Diva.

Samtang  ang presidente sa Parish Youth Coordinating Council –Guadalupe (PYCC)  nga si Marvin Cabornay miangkon nga tungod sa kanindot sa maong serye, nanghuwam gyud siya og DVD copy niini.

“Nakadungog ko about anang salidaha sa among silingan, nindot daw unya nakabantay ko, nga sa title pa lang kay ma-interesado gyud ka ,” nagkanayon si Cabornay.

Si Jessica Ann Pareja,  Cebu City hall beat reporter sa igsuong mantalaan sa Banat News, ang The Freeman, miangkon nga  kanunay siya nga magsunod sa maong serye.

Kung duna gani siya’y importante nga lakaw,  dili malikayan nga malaktawan niya ang usa o pipila ka episode busa iya dayon i-check sa internet ang mga eksena nga iyang nabiyaan.

Atangi ugma kay atong ilailahon og maayo ang upat ka mga main characters sa Temptation of Wife. Of course with matching pictures, aron inyong guntingon ug ilakip sa inyong collection. Yeey!